സമ്പൂര്‍ണ വൈദ്യുതീകരണം നടക്കില്ലെന്ന് എംഎം മണി

കണ്ണൂര്‍: കേരളത്തില്‍ സമ്പൂര്‍ണ വൈദ്യുതീകരണം സാധ്യമല്ലെന്ന് വൈദ്യുതി വകുപ്പ് മന്ത്രി എംഎം മണി. ഓരോ വീട്ടിലും വൈദ്യുതി എത്തിക്കുക എന്നത് പ്രായോഗികമല്ല. ദിവസവും പുതിയ വീടുകള്‍ വരുന്ന സംസ്ഥാനമാണ് കേരളം. അങ്ങനെയുള്ളിടത്ത് എങ്ങനെയാണ് എല്ലാ വീട്ടിലും വൈദ്യുതി എത്തിക്കാനാവുകയെന്ന് മന്ത്രി ചോദിച്ചു. കണ്ണൂരിനെ സമ്പൂര്‍ണ വൈദ്യുതീകൃത ജില്ലയായി പ്രഖ്യാപിക്കുന്ന ചടങ്ങില്‍ സംസാരിക്കുകയായിരുന്നു മണി.

സമ്പൂര്‍ണ വൈദ്യുതീകൃതമെന്ന പ്രഖ്യാപനം നടത്താന്‍ മാത്രമേ പറ്റൂ എന്നാണ് മണി പറഞ്ഞത്. കേരളത്തിലെ എല്ലാ വീടുകളിലും വൈദ്യുതി എത്തിയെന്ന് ഒരു മാസമെങ്കിലും പറയാന്‍ കഴിഞ്ഞാല്‍ മതിയായിരുന്നെന്ന് മന്ത്രി പറഞ്ഞു.

മെയ് 30 ന് കേരളത്തെ സമ്പൂര്‍ണ വൈദ്യുതീകൃത സംസ്ഥാനമായി മുഖ്യമന്ത്രി പിണറായി വിജയന്‍ പ്രഖ്യാപിക്കാനിരിക്കെയാണ് മണിയുടെ പ്രസ്‍താവന. അതിരപ്പിള്ളി പദ്ധതിയെക്കുറിച്ച് പറയുമ്പോള്‍ എല്‍ഡിഎഫിന് അകത്തും പുറത്തും പ്രശ്‍നമാണ്. എന്നാല്‍ അതിനെക്കുറിച്ച് ചര്‍ച്ച നടക്കണം.

അതിരപ്പള്ളി വെള്ളച്ചാട്ടം പ്രകൃത്യാല്‍ ഉണ്ടായതാണെന്നാണ് പരിസ്ഥിതി വാദികളുടെ ധാരണ. എന്നാല്‍ കെഎസ്ഇബിയുടെ വിവിധ പദ്ധതികള്‍കൊണ്ടാണ് വെള്ളച്ചാട്ടം ഉണ്ടായതെന്നും മന്ത്രി പറഞ്ഞു.

Complete electrification impossible: Mani

Electricity minister MM Mani said that complete electrification is not possible in a state like Kerala.