കേരളത്തില്‍ സമ്പൂര്‍ണ ലോക്ക്ഡൗണ്‍ ഫലപ്രദമാകില്ല, സമൂഹവ്യാപനത്തെ ചെറുക്കേണ്ടതിന് നിര്‍ദേശം മുന്നോട്ടുവെച്ച് ഐഎംഎ

കൊച്ചി: കേരളത്തില്‍ സമ്പൂര്‍ണ ലോക്ക്ഡൗണ്‍ ഫലപ്രദമാകില്ലെന്ന് ഐഎംഎ സംസ്ഥാന പ്രസിഡന്റ് ഡോ. എബ്രഹം വര്‍ഗീസ്. പ്രാദേശിക ലോക്ക്ഡൗണുകളാണ് ഗുണം ചെയ്യുകയെന്ന് അദ്ദേഹം പറഞ്ഞു.

കേരളത്തില്‍ നേരത്തെ സമ്പൂര്‍ണ ലോക്ക്ഡൗണ്‍ നടപ്പാക്കിയതോടെ കൊവിഡ് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കാനും കൊവിഡ് വ്യാപനം നിയന്ത്രിക്കാനും സാധിച്ചിട്ടുണ്ട്. എന്നാല്‍, ഇപ്പോഴത്തെ സാഹചര്യത്തില്‍ സമ്പൂര്‍ണ ലോക്ക്ഡൗണിനേക്കാളും പ്രാദേശിക ലോക്ക്ഡൗണുകളാണ് ഫലപ്രദമാകുക. കൊവിഡ് രോഗവ്യാപനം ഉണ്ടായ ക്ലസ്റ്ററുകള്‍ ഉള്‍പ്പെടുന്ന മേഖലകള്‍ തിരിച്ച് ലോക്ക്ഡൗണ്‍ നടപ്പിലാക്കണമെന്ന് ഐഎംഎ നിര്‍ദേശിച്ചു.

Also Read: സംസ്ഥാനത്ത് സമ്പൂര്‍ണ ലോക്ക് ഡൗൺ ഉടന്‍ വേണ്ടെന്ന് തീരുമാനം; അന്തിമ തീരുമാനം തിങ്കളാഴ്‌ച

കേരളത്തില്‍ സമൂഹവ്യാപനത്തിന്റെ എല്ലാ ലക്ഷണങ്ങളുമുണ്ട്. തിരുവനന്തപുരം, കൊച്ചി, കോഴിക്കോട് തുടങ്ങി എല്ലാ പ്രദേശത്തും ഈ ലക്ഷണങ്ങള്‍ പ്രകടമാണ്. ഉറവിടം മനസ്സിലാകാത്ത രോഗികളുടെ എണ്ണം വര്‍ധിക്കുന്നു, ലക്ഷണങ്ങളില്ലാത്ത കൊവിഡ് പോസിറ്റീവ് കേസുകള്‍ തുടങ്ങിയ കാരണങ്ങള്‍ പരിഗണിച്ചാണ് സമൂഹവ്യാപനം ഉണ്ടായിക്കഴിഞ്ഞെന്ന് ഐഎംഎ ആവര്‍ത്തിച്ച് പറയുന്നത്.

Also Read: രാജ്യത്ത് കൊവിഡ് വ്യാപനം അതിരൂക്ഷം; അടച്ചിടല്‍ നീട്ടാനൊരുങ്ങി ഈ സംസ്ഥാനങ്ങള്‍

ആരും കൊവിഡ് വാഹകരാകാം. പരിശോധനയിലൂടെ അല്ലാതെ ഒരാള്‍ വൈറസ് വാഹകരല്ലെന്ന് പറയാന്‍ സാധിക്കില്ലെന്ന സാഹചര്യമാണ് നിലവിലുള്ളത്. അതിനാല്‍ സാമൂഹിക അകലം, മാസ്‌ക് ധരിക്കല്‍, ശുചിത്വം എന്നിവ പാലിക്കണം. മുന്‍കരുതലുകള്‍ എടുത്തുകൊണ്ട് മാത്രമേ രോഗപ്രതിരോധം സാധ്യമാകൂവെന്നും ഐഎംഎ പ്രസിഡന്റ് വ്യക്തമാക്കി.