കോന്നിയിലെ സ്ഥാനാര്‍ഥി; സി.പി.എം. ജില്ലാ സെക്രട്ടേറിയറ്റില്‍ തീരുമാനമായില്ല

പത്തനംതിട്ട: ഉപതിരഞ്ഞെടുപ്പ് നടക്കുന്ന കോന്നി നിയമസഭാ മണ്ഡലത്തിലെ എല്‍.ഡി.എഫ്. സ്ഥാനാര്‍ഥിയുടെ കാര്യത്തില്‍ തീരുമാനമായില്ല. ഇന്ന് ചേര്‍ന്ന സി.പി.എം. പത്തനംതിട്ട ജില്ലാ സെക്രട്ടേറിയറ്റ് യോഗത്തിലും സമവായത്തിലെത്താനായില്ല.

ഡി.വൈ.എഫ്.ഐ. സംസ്ഥാന വൈസ് പ്രസിഡന്‍റ് കെ.യു.ജനീഷ് കുമാര്‍, സി.പി.എം. ജില്ലാ സെക്രട്ടറി കെ.പി.ഉദയഭാനു, സി.ഐ.ടി.യു. ജില്ലാ സെക്രട്ടറി പി.ജെ.അജയകുമാര്‍, കോന്നി ബ്ലോക്ക് പഞ്ചായത്ത് മുന്‍ പ്രസിഡന്‍റ് എം.എസ്.രാജേന്ദ്രന്‍ എന്നിവരാണ് പരിഗണനയിലുള്ളത്. ജില്ലയ്ക്ക് പുറത്തുള്ളവരെ പരിഗണിക്കുന്നതും ആലോചിക്കുന്നുണ്ട്. തീരുമാനം ജില്ലാ സെക്രട്ടേറിയറ്റ് മണ്ഡലം കമ്മിറ്റിക്ക് വിട്ടു.

1996-ല്‍ നഷ്‍ടപ്പെട്ട കോന്നി മണ്ഡലം മികച്ച സ്ഥാനാര്‍ഥിയെ നിര്‍ത്തി തിരിച്ചുപിടിക്കാനുള്ള ശ്രമത്തിലാണ് എല്‍.ഡി.എഫ്. ഇതിനുള്ള ഊര്‍ജിത ശ്രമങ്ങള്‍ ഒന്നരമാസം മുമ്പുതന്നെ തുടങ്ങിയിട്ടുണ്ട്.