തരൂരാകുമോ അടുത്ത മുഖ്യമന്ത്രി? അഴിച്ചുപണി കുറച്ചു; തെരഞ്ഞെടുപ്പ് ഒരുക്കങ്ങള്‍ക്കായി കോൺഗ്രസിൽ ചർച്ച

തിരുവനന്തപുരം: തദ്ദേശ തെരഞ്ഞെടുപ്പിലെ കനത്ത തിരിച്ചടിയ്ക്ക് ശേഷം മുഖ്യമന്ത്രി സ്ഥാനാര്‍ഥി അടക്കമുള്ള നിര്‍ണായക തീരമാനങ്ങളെടുക്കാൻ കോൺഗ്രസ് ചര്‍ച്ചകള്‍ ആരംഭിച്ചു. തെരഞ്ഞെടുപ്പിലെ തിരിച്ചടിയ്ക്കു പിന്നാലെ പാര്‍ട്ടിയിൽ നേതൃമാറ്റം വേണമെന്ന് ആവശ്യമുയര്‍ന്നതിനു പിന്നാലെയാണ് ഉന്നതതല ചര്‍ച്ചകള്‍. വരുന്ന നിയമസഭാ തെരഞ്ഞെടുപ്പിൽ കോൺഗ്രസിനെ നയിക്കുന്നത് കൂട്ടായ നേതൃത്വമായിരിക്കുമെന്നാണ് ഹൈക്കമാൻഡ് വ്യക്തമാക്കിയിരിക്കുന്നത്.

അടുത്ത തെരഞ്ഞെടുപ്പിൽ തിരുവനനന്തപുരം എംപി ശശി തരൂര്‍ മത്സരിക്കണമെന്നും തരൂര്‍ മുഖ്യമന്ത്രി സ്ഥാനാര്‍ഥിയായി എത്തുന്നത് മുന്നണിയ്ക്ക് മൊത്തത്തിൽ ഗുണം ചെയ്യുമെന്നും സോഷ്യൽ മീഡിയയിൽ പ്രചാരണങ്ങളുണ്ടായിരുന്നു. കെപിസിസി പ്രസിഡൻ്റ് അടക്കമുള്ളവര്‍ മാറി നില്‍ക്കണമെന്നും കെ സുധാകരനും കെ മുരളീധരനും നേതൃത്വത്തിലേയ്ക്ക് എത്തണമെന്നും ആവശ്യമുയര്‍ന്നു. എന്നാൽ ഇതിൽ ഏതെങ്കിലും ആവശ്യങ്ങള്‍ പരിഗണിക്കപ്പെടുന്ന കാര്യത്തിൽ വ്യക്തതയില്ല.

Also Read: സംസ്ഥാനത്ത് വാക്‌സിനേഷനായി രജിസ്റ്റർ ചെയ്തത് 3.13 ലക്ഷം പേർ; തയ്യാറെടുപ്പുകൾ ഇങ്ങനെ

എംപിമാരെ നിയമസഭാ തെരഞ്ഞെടുപ്പിൽ മത്സരിപ്പിക്കില്ലെന്നാണ് കേരളത്തിൻ്റെ ചുമതലയുള്ള എഐസിസി ജനറൽ സെക്രട്ടറി താരിഖ് അൻവര്‍ മനോരമ ന്യൂസിനോട് പറഞ്ഞത്. യുഡിഎഫ് കൺവീനര്‍ എംഎം ഹസനെതിരെ എംഎൽഎമാരും എംപിമാരും കത്തു നല്‍കിയെന്ന വാര്‍ത്ത തെറ്റാണെന്നും അദ്ദേഹം വ്യക്തമാക്കി. അതേസമയം, തദ്ദേശ തെരഞ്ഞെടുപ്പിൽ കോൺഗ്രസ് നേരിട്ട തിരിച്ചടിയെപ്പറ്റിയുള്ള റിപ്പോര്‍ട്ട് സോണിയ ഗാന്ധിയ്ക്ക് കൈമാറിയതായും അദ്ദേഹം പറഞ്ഞു.

Also Read: വിവാദങ്ങൾക്കും വിമർശനങ്ങൾക്കും ഒടുവിൽ യതീഷ് ചന്ദ്ര കണ്ണൂർ പോലീസിൻ്റെ തലപ്പത്തു നിന്നും സ്ഥാനമൊഴിയുന്നു

നിയമസഭാ തെരഞ്ഞെടുപ്പിന് അധികകാലം ശേഷിക്കുന്നില്ലെന്നിരിക്കേ പാര്‍ട്ടി നേതൃത്വത്തിൽ വലിയ അഴിച്ചുപണി വേണ്ടെന്ന നിലപാടിലാണ് ഹൈക്കമാൻഡ്. ഈ സാഹചര്യത്തിൽ ഉമ്മൻ ചാണ്ടിയും രമേശ് ചെന്നിത്തലും മുല്ലപ്പള്ളി രാമചന്ദ്രനും ചേര്‍ന്നായിരിക്കും തെരഞ്ഞെടുപ്പിൽ പാര്‍ട്ടിയെ നയിക്കുക. അതേസമയം, താഴേത്തട്ടിൽ വലിയ അഴിച്ചുപണിയ്ക്ക് പാര്‍ട്ടി ഒരുങ്ങുന്നുവെന്നാണ് റിപ്പോര്‍ട്ട്.

തെരഞ്ഞെടുപ്പ് പ്രചാരണ സമിതി ചെയര്‍മാനായി ഉമ്മൻ ചാണ്ടിയെ നിയമിക്കുന്ന കാര്യം ഉടൻ ചര്‍ച്ച ചെയ്യും. അതേസമയം, മുന്നണിയുടെ മുഖ്യമന്ത്രി സ്ഥാനാര്‍ഥി ആരെന്ന കാര്യത്തിൽ ഇനിയും തീരുമാനമായിട്ടില്ല.