കത്തിൽ ഉമ്മൻ ചാണ്ടിക്കെതിരെ ആരോപണം
നിയമസഭാ തെരഞ്ഞെടുപ്പിനായുള്ള മേൽനോട്ടസമിതിയുടെ അധ്യക്ഷനായി ഉമ്മൻ ചാണ്ടിയെ നിയോഗിച്ചത് തിരിച്ചടിയായെന്ന് സോണിയ ഗാന്ധിക്ക് എഴുതിയ കത്തിൽ രമേശ് ചെന്നിത്തല വ്യക്തമാക്കിയെന്നാണ് ഏഷ്യാനെറ്റ് റിപ്പോർട്ട് ചെയ്‌തത്. "തെരഞ്ഞെടുപ്പ് മേൽനോട്ട സമിതിയുടെ അധ്യക്ഷ സ്ഥാനത്തേക്ക് എത്താൻ ഉമ്മൻ ചാണ്ടി ആഗ്രഹിച്ചിരുന്നില്ല. എന്നാൽ ഹൈക്കമാൻഡ് അത്തരമൊരു തീരുമാനം സ്വീകരിച്ചു. പ്രതിപക്ഷ നേതാവ് സ്ഥാനത്ത് അഞ്ച് വർഷം താൻ ഉണ്ടായിരുന്നു. ഇതിനിടെയാണ് തെരഞ്ഞെടുപ്പിനായുള്ള മേൽനോട്ടസമിതിയുടെ അധ്യക്ഷനായി ഉമ്മൻ ചാണ്ടിയെ നിയോഗിച്ചത്. ഹിന്ദു വോട്ടുകൾ നഷ്‌ടപ്പെടാൻ ഈ സാഹചര്യം കാരണമായി"- എന്നും കത്തിൽ ചെന്നിത്തല പറയുന്നുണ്ട്.
വിമർശനവുമായി കെ സി ജോസഫ്
നിയമസഭാ തെരഞ്ഞെടുപ്പ് ഫലവുമായി ബന്ധപ്പെട്ട് ഉമ്മൻ ചാണ്ടിയെ പരോക്ഷമായി വിമർശിച്ച് കൊണ്ടുള്ള കത്ത് സോണിയ ഗാന്ധിക്ക് അയച്ചോ എന്ന് രമേശ് ചെന്നിത്തല വ്യക്തമാക്കണമെന്ന് കെ സി ജോസഫ് വ്യക്തമാക്കി. ഏഷ്യാനെറ്റ് ന്യൂസിനോടാണ് അദ്ദേഹം ഇക്കാര്യം പറഞ്ഞത്. " രമേശ് ചെന്നിത്തല സോണിയയ്‌ക്ക് അയച്ച കത്തിൽ എന്തൊക്കെ പറഞ്ഞുവെന്ന് തനിക്കറിയില്ല. എന്നാൽ ഇങ്ങനെയൊരു വാർത്ത പുറത്തുവന്ന സ്ഥിതിക്ക് ഇക്കാര്യത്തിൽ നിലപാട് വ്യക്തമാക്കേണ്ട ഉത്തരവാദിത്തം ചെന്നിത്തലയ്‌ക്കുണ്ട്. കത്തുമായി ബന്ധപ്പെട്ട് ആശയക്കുഴപ്പം നിലനിൽക്കുന്നുണ്ട്"- എന്നും അദ്ദേഹം പറഞ്ഞു.
തെരഞ്ഞെടുപ്പിൽ ട്രമ്പിൾഷൂട്ടറായി ഉമ്മൻ ചാണ്ടി ഓടിനടന്നു
തെരഞ്ഞെടുപ്പ് മേൽനോട്ട സമിതിയുടെ അധ്യക്ഷ സ്ഥാനത്തേക്ക് ഉമ്മൻ ചാണ്ടി എത്തിയതോടെ ഹിന്ദു വോട്ടുകൾ നഷ്‌ടപ്പെട്ടെന്ന വാർത്തയോട് രൂക്ഷമായ ഭാഷയിലാണ് കെ സി ജോസഫ് പ്രതികരിച്ചത്. "ഭൂരിപക്ഷ വോട്ടുകളല്ല, പ്രതീക്ഷിച്ച പോലെ ന്യൂനപക്ഷ വോട്ടുകൾ ലഭിക്കാതെ പോയതാണ് തെരഞ്ഞെടുപ്പ് തോൽവിക്ക് കാരണമായത്. തെരഞ്ഞെടുപ്പിൽ സംഘടനാപരമായ പ്രശ്‌നങ്ങളുണ്ടായിരുന്ന വയനാട്, പാലാക്കാട്, ഇരിക്കൂർ എന്നിവടങ്ങളിൽ ട്രബിൾഷൂട്ടറായി ഉമ്മൻ ചാണ്ടി ഓടിയെത്തി പ്രവർത്തിച്ചു" - എന്നും ഏഷ്യാനെറ്റ് ന്യൂസിനോട് കെ സി ജോസഫ് വ്യക്തമാക്കി.
വിവാദങ്ങളിൽ മുല്ലപ്പള്ളിക്ക് പിന്തുണ
നിയമസഭാ തെരഞ്ഞെടുപ്പ് തോൽവിയെക്കുറിച്ച് പഠിക്കാൻ നിയോഗിച്ച അശോക് ചവാൻ സമിതിക്ക് മുൻപിൽ ഹാജരാകാനില്ലെന്ന കെപിസിസി പ്രസിഡൻ്റ് മുല്ലപ്പള്ളി രാമചന്ദ്രൻ്റെ നിലപാടിനെ കെ സി ജോസഫ് പിന്തുണച്ചു. "അശോക് ചവാൻ സമിതിയെക്കാൾക്ക് പ്രധാനമാണ് കെ പി സിസിക്ക് അധ്യക്ഷൻ എ ഐസിസി അധ്യക്ഷയ്‌ക്ക് കൈമാറിയ റിപ്പോർട്ട്. സമഗ്രമായ റിപ്പോർട്ടാണത്. ചവാൻ സമിതിയുടെ റിപ്പോർട്ട് വരുമ്പോൾ അതിൽ കെപിസിസി അധ്യക്ഷൻ്റെ നിഗമനങ്ങളും ഉണ്ടാവും" - എന്നും അദ്ദേഹം പറഞ്ഞു. തെരഞ്ഞെടുപ്പ് തൊൽവിയുമായി ബന്ധപ്പെട്ട വിശദമായ റിപ്പോർട്ട് സോണിയ ഗാന്ധിക്ക് കൈമാറിയിട്ടുണ്ടെന്നും, അത് തൻ്റെ പ്രസ്‌താവനയായി സ്വീകരിക്കണമെന്നുമാണ് മുല്ലപ്പള്ളി രാമചന്ദ്രൻ വ്യക്തമാക്കിയത്. തെരഞ്ഞെടുപ്പ് തോൽവിയുടെ കാരണങ്ങൾ സോണിയ ഗാന്ധിയെയും രാഹുൽ ഗാന്ധിയെയും അറിച്ചിട്ടുണ്ടെന്നും, ഈ റിപ്പോർട്ടിൻ്റെ പകർപ്പ് സമതിക്ക് മുന്നിൽ ഹാജരാക്കാമെന്ന നിലപാടിലാണ് മുല്ലപ്പള്ളി.