വിദേശമദ്യ ഇടപാട്; സര്‍ക്കാരിനെതിരെ അഴിമതി ആരോപണവുമായി തിരുവഞ്ചൂര്‍

തിരുവനന്തപുരം: വിദേശ നിര്‍മ്മിത വിദേശ മദ്യം വില്‍ക്കാനുള്ള സര്‍ക്കാര്‍ അനുമതിക്കു പിന്നില്‍ അഴിമതിയുണ്ടെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. വിദേശത്തെ മദ്യമാഫിയയെ കൊണ്ടുവരാന്‍ സര്‍ക്കാര്‍ കള്ളക്കളി നടത്തിയെന്നും തിരുവഞ്ചൂര്‍ ആരോപിച്ചു.

മന്ത്രിസഭ തീരുമാനിക്കാതെയാണ് വിദേശ നിര്‍മ്മിത വിദേശ മദ്യം വില്‍ക്കാനുള്ള അനുമതി നല്‍കിയത്. ഇതില്‍ വിദേശ കമ്പനികളുടെ രഹസ്യ ഇടപാടും നടന്നിട്ടുണ്ട്. സര്‍ക്കാര്‍ ഈ ഇടപാട് എത്രകോടിയുടേതാണെന്ന് വ്യക്തമാക്കണമെന്നും തിരുവഞ്ചൂര്‍ ആവശ്യപ്പെട്ടു.

കേരളത്തെ മദ്യത്തില്‍ മുക്കാനാണ് സര്‍ക്കാരിന്‍റെ നീക്കം. ബ്രൂവറി അഴിമതിക്ക് ശേഷം സംസ്ഥാനത്ത് നടന്ന ഏറ്റവും വലിയ അഴിമതിയാണിത്. മദ്യ കുംഭകോണമാണ് നടക്കുന്നതെന്നും ഉടന്‍ തന്നെ അന്വേഷണം നടത്തണമെന്നും തിരുവഞ്ചൂര്‍ ആവശ്യപ്പെട്ടു.