ചെല്ലാനത്ത് സമരക്കാർ കോൺഗ്രസ് നേതാക്കളെ തടഞ്ഞു

കൊച്ചി: ഓഖി ദുരന്ത ശേഷം സർക്കാർ സഹായ നടപടികളിൽ പ്രതിഷേധിച്ച് ചെല്ലാനത്ത് നടത്തി വരുന്ന റിലേ നിരാഹാര സമരം നാലാം ദിവസവും തുടരുന്നു. സമരപ്പന്തൽ സന്ദർശിക്കാൻ എത്തിയ കോൺഗ്രസ് നേതാക്കളെ സമരക്കാർ തടഞ്ഞു. ബെന്നി ബെഹനാൻ എംഎൽഎ, എറണാകുളം ഡിസിസി പ്രസിഡന്‍റ് വിനോദ് എന്നിവരെയാണ് സമരക്കാർ തടഞ്ഞത്. എന്നാൽ, മുൻ മുഖ്യമന്ത്രി ഉമ്മൻചാണ്ടിയുമായി ചർച്ച നടത്താൻ സമരക്കാർ തയ്യാറായി.

ചൊല്ലാനത്ത് കടൽഭിത്തി വേണമെന്ന തീരദേശവാസികളുടെ ആവശ്യം തികച്ചും ന്യായമാണെന്ന് ഉമ്മൻ ചാണ്ടി പ്രതികരിച്ചു. കേരള ധനകാര്യ മന്ത്രിയുമായും സർക്കാരുമായും താൻ ഈ കാര്യം ചർച്ച ചെയ്യുമെന്നും ഉമ്മൻ ചാണ്ടി അറിയിച്ചു. കഴിഞ്ഞ യു.ഡി.എഫ് സർക്കാർ 2014ൽ ചൊല്ലാനത്തെ കടൽഭിത്തിക്കുള്ള ഫണ്ട് അനുവദിച്ചിരുന്നു. ഇതുപ്രകാരം മൂന്ന് തവണ ടെണ്ടർ വിളിച്ചെങ്കിലും ആരും അത് ഏറ്റെടുത്തില്ല. നിർമാണം ഉടൻ തുടങ്ങാൻ സർക്കാരിനോട് ആവശ്യപ്പെടുമെന്ന് ഉമ്മൻ ചാണ്ടി സമരക്കാർക്ക് ഉറപ്പ് നൽകി.