'ലില്ലി പൂക്കളായിരുന്നു അവൾക്ക് ഇഷ്ടം'; സുനന്ദയുടെ പിറന്നാൾ ദിനത്തിൽ തരൂർ

തിരുവനന്തപുരം: അന്തരിച്ച സുനന്ദാ പുഷ്കറിനെ അവരുടെ പിറന്നാൾ ദിനത്തിൽ ഓർമിച്ച് കോൺഗ്രസ് നേതാവ് ശശി തരൂർ എംപി. സുനന്ദയുടെ ചിത്രത്തിനു മുന്നിൽ ലില്ലി പൂക്കൾ സമർപ്പിച്ചുകൊണ്ടുള്ള ചിത്രം ശശി തരൂർ ഫേസ്ബുക്കിൽ പങ്കുവെച്ചു.

അന്തരിച്ച തന്റെ ഭാര്യ സുന്ദയെ ഓർമ്മിക്കുന്നു. ജമ്മു കാശ്മീരിലെ സോപോറിൽ 56 വർഷം മുമ്പാണ് അവൾ ജനിച്ചത്. ലില്ലി പൂക്കളായിരുന്നു സുനന്ദയ്ക്ക് ഏറ്റവും ഇഷ്ടം. സുഹൃത്ത് നൽകിയ ലില്ലി പൂക്കൾ സുനന്ദയുടെ ചിത്രത്തിനു മുന്നിൽ വെച്ചുകൊണ്ടുള്ള ചിത്രം പങ്കുവെച്ച് തരൂർ ഫേസ്ബുക്കിൽ കുറിച്ചു.

1962ലാണ് സുനന്ദ ജനിച്ചത്. യുഎൻ അണ്ടർ ജനറൽ സെക്രട്ടറിയായി പ്രവർത്തിക്കുമ്പോഴാണ് തരൂർ സുനന്ദയെ വിവാഹം കഴിച്ചത്. സുനന്ദയുടെ മൂന്നാം വിവാഹമായിരുന്നു. 2010 ഓഗസ്റ്റ് 12നായിരുന്നു തരൂർ-സുനന്ദ വിവാഹം.

2014 ജനുവരി 17നാണ് സുനന്ദ പുഷ്ക്കറിനെ ഡൽഹിയിലെ ഹോട്ടലിൽ മരിച്ച നിലയിൽ കണ്ടെത്തിയത്. ഡൽഹി ലീല ഹോട്ടലിലാണ് അവരുടെ മൃതദേഹം കണ്ടെത്തിയത്.