മലപ്പുറം ജില്ലയില്‍ കണ്‍ട്രോള്‍ റൂമുകള്‍ പ്രവര്‍ത്തനക്ഷമമാക്കാന്‍ നിര്‍ദ്ദേശം

മലപ്പുറം: ജില്ലയിലെ എല്ലാ താലൂക്കുകളിലും കണ്‍ട്രോള്‍ റൂമുകള്‍ പ്രവര്‍ത്തനക്ഷമമാക്കാന്‍ തഹസില്‍ദാര്‍മാര്‍ക്ക് നിര്‍ദ്ദേശം. വെള്ളപ്പൊക്കത്തിനും ഉരുള്‍പ്പൊട്ടലിനും സാധ്യതയുള്ള താലൂക്കുകളില്‍ ദുരിതാശ്വാസ ക്യാമ്പുകള്‍ സജ്ജമാകും.

ഒരു താലൂക്കിന് ഒരു ഡെപ്യൂട്ടി കളക്ടര്‍ എന്ന നിലക്കാണ് ചാര്‍ജ് ഒാഫീസര്‍മ്മാരെ നിയോഗിക്കുന്നത്. മുമ്പ് പ്രളയം ബാധിച്ച സ്ഥലങ്ങളില്‍ ഇന്ന് പോലീസ് ജാഗ്രതാ നിര്‍ദ്ദേശം നല്‍കിയിട്ടുണ്ട്. മലയോരമേഖലകളില്‍ രാത്രിസഞ്ചാരം ഒഴിവാക്കണമെന്ന് മുന്നറിയിപ്പ് നല്‍കിയിട്ടുണ്ട്.

ദുരന്തനിവാരണ വിഭാഗത്തിന്‍റെ നിര്‍ദ്ദേശത്തെ തുടര്‍ന്ന് പ്രളയ ബാധിത പ്രദേശങ്ങളിലും ഉരുള്‍പൊട്ടല്‍ പ്രദേശങ്ങളിലുമുള്ള ആശുപത്രികള്‍, പിഎച്ച്സികള്‍, സിഎച്ച്സികള്‍ തുടങ്ങിയവ 24 മണിക്കൂര്‍ പ്രവര്‍ത്തന സജ്ജമായിട്ടുണ്ട്.