മീശ നോവല്‍ കത്തിച്ച് പ്രതിഷേധം

തിരുവനന്തപുരം: വിവാദമായ നോവല്‍ 'മീശ'യുടെ കോപ്പികള്‍ കത്തിച്ച് പ്രതിഷേധം. ഡിസി ബുക്‌സിന്‍റെ തിരുവനന്തപുരം സ്റ്റാച്യു ഓഫീസിന് മുന്നിലാണ് ഒരു സംഘം ആളുകള്‍ നോവല്‍ കത്തിച്ചത്. ബിജെപി അനുഭാവികളാണ് നോവല്‍ കത്തിച്ചതെന്ന് വിവിധ മാധ്യമങ്ങള്‍ റിപ്പോര്‍ട്ട് ചെയ്‍തു.

തീവ്ര ഹിന്ദു സംഘടനകളുടെ എതിര്‍പ്പിനെ തുടര്‍ന്ന് എസ്‍. ഹരീഷ് മാതൃഭൂമി ആഴ്‍ച്ചപതിപ്പില്‍ നിന്ന് പിന്‍വലിച്ച നോവലാണ് മീശ. ഹിന്ദു സ്ത്രീകളെ അപമാനിക്കുന്ന രീതിയില്‍ ഉള്ളടക്കം ഉണ്ടെന്ന് ആരോപിച്ചാണ് നോവലിന് എതിരെ വ്യാപകമായി പ്രതിഷേധം സോഷ്യല്‍ മീഡിയയിലും പുറത്തും നടന്നത്.

മീശ നോവലിലെ വിവാദ ഭാഗം നീക്കം ചെയ്യണമെന്ന് ആവശ്യപ്പെട്ട് നല്‍കിയ ഹര്‍ജി നാളെ സുപ്രീംകോടതി പരിഗണിക്കും.