പോലീസുകാർക്ക് പിറന്നാളിനും വിവാഹവാർഷികത്തിനും അവധി

കോഴിക്കോട്: ജന്മദിനത്തിനും വിവാഹവാര്‍ഷികത്തിനും ഇനിമുതൽ കോഴിക്കോട്ടെ പോലീസുകാര്‍ക്ക് പ്രത്യേക അവധി. കോഴിക്കോട് സിറ്റി പോലീസാണ് വര്‍ഷത്തിൽ ഈ രണ്ട് വിശേഷദിവസങ്ങളിൽ പോലീസുകാര്‍ക്ക് അവധി നല്‍കി ചരിത്രത്തിൽ ഇടം നേടിയിരിക്കുന്നത്. പോലീസുകാരുടെ മാനസികസമ്മര്‍ദ്ദം കുറയ്ക്കുക എന്നതാണ് പുതിയ നീക്കത്തിന്‍റെ ഉദ്ദേശ്യം.

ഇതുസംബന്ധിച്ച് സിറ്റി പോലീസ് കമ്മീഷണര്‍ കാളിരാജ് എസ് മഹേഷ്‍‍കുമാര്‍ തിങ്കളാഴ്ച പുറപ്പെടുവിച്ച ഉത്തരവ് ഒരാഴ്ചയ്ക്കുള്ളിൽ പ്രാബല്യത്തിൽ വരും. പോലീസുകാരുടെ ജന്മദിനവും വിവാഹവാര്‍ഷികവും സംബന്ധിച്ച വിവരങ്ങള്‍ ശേഖരിക്കാനാണ് ഒരാഴ്ച സമയം. പോലീസുകാര്‍ക്ക് ഇത്തരത്തിൽ പ്രത്യേക അവധികള്‍ നല്‍കുന്ന കേരളത്തിലെ ആദ്യ ജില്ലയാണ് കോഴിക്കോട്.

കാഷ്വൽ അവധികള്‍, മെഡിക്കൽ അവധികള്‍ എന്നിങ്ങനെ ചട്ടപ്രകാരം അവധികള്‍ നിരവധിയാണെങ്കിലും അവശ്യസര്‍വീസ് എന്ന വിഭാഗത്തിൽപ്പെട്ട പോലീസിന് അനുവദിക്കപ്പെട്ട അവധികളുടെ പകുതി പോലും ലഭിക്കാറില്ലെന്നതാണ് വാസ്തവം. ഇത് പലപ്പോഴും കുടുംബത്തിലും പ്രശ്നങ്ങള്‍ക്ക് കാരണമാകാറുണ്ട്. ഇത് ജോലിസ്ഥലത്തും പ്രതിഫലിക്കുന്നു. ഇതുസംബന്ധിച്ച് ഒരുമാസംമുന്‍പ് കേരള പോലീസ് അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ കമ്മിഷണര്‍ക്ക് നിവേദനം നല്‍കിയിരുന്നു.

ഇതേത്തുടര്‍ന്നാണ് പ്രത്യേക അവധികള്‍ അനുവദിച്ചു കൊണ്ടുള്ള ഉത്തരവിറക്കിയത്. ഇത് സംസ്ഥാനമൊട്ടാകെ വ്യാപിപ്പിക്കാനാണ് ആലോചന. തീരുമാനത്തെ ജില്ലാ പോലീസ് അസോസിയേഷൻ സ്വാഗതം ചെയ്തിട്ടുണ്ട്. ഇത്തരം അവധികള്‍ സേനാംഗങ്ങളുടെ മാനസികസമ്മര്‍ദ്ദം ഒരു പരിധിവരെ കുറയ്ക്കാൻ സഹായിക്കുമെന്ന് ജില്ലാ സെക്രട്ടറി ജി എസ് ശ്രീലേഷ് അഭിപ്രായപ്പെട്ടു.