കൊറോണ നിരീക്ഷണത്തിലുള്ളയാള്‍ മയക്കുമരുന്നുമായി പിടിയില്‍

വൈത്തിരി: വയനാട്ടില്‍ കുടകില്‍ നിന്നും എത്തിയ യുവാവിനെ മയക്കുമരുന്നുമായി കസ്റ്റഡിയില്‍ എടുത്തു. കുടകില്‍ ഒരാളില്‍ കൊറോണ വൈറസ് ബാധ സ്ഥിരീകരിച്ചിരുന്നു. ഈ സാഹചര്യത്തില്‍ കര്‍ശന നിയന്ത്രണമാണ് കുടകില്‍ ഏര്‍പ്പെടുത്തിയിരിക്കുന്നത്. കുടകില്‍ നിന്ന് വയനാട്ടിലേക്കുള്ള യാത്ര നിരോധിക്കുകയും മലയാളികള്‍ കുടകില്‍ ജോലികള്‍ക്കായി പോകരുതെന്ന് ജില്ലാ ഭരണകൂടം നിര്‍ദ്ദേശം നല്‍കുകയും ചെയ്തിരുന്നു.

കൊറോണ ബാധിത പ്രദേശത്ത് വീട്ടില്‍ നിരീക്ഷണത്തില്‍ കഴിയണമെന്ന് ആരോഗ്യ വകുപ്പ് അധികൃതര്‍ നിര്‍ദ്ദേശം നല്‍കിയിരുന്ന യുവാവണ് വൈത്തിരിയില്‍ നിന്നും പിടിയിലായത്. കൊടുവളളി സ്വദേശിയായ യുവാവിനെ എസ്‌ഐ ജിതേഷിന്‌റെ നേതൃത്വത്തിലുള്ള സംഘമാണ് പിടികൂടിയത്. ഇയാള്‍ക്കൊപ്പം ഉണ്ടായിരുന്ന മറ്റു മൂന്ന് പേരും പിടിയിലായിട്ടുണ്ട്. ലക്കിടിക്കടുത്ത് അറമലയിലെ ഒരു വാടക വീട്ടില്‍ തമ്പടിച്ചിരിക്കുകയായിരുന്നു സംഘം.

Also Read: ജനതാ കര്‍ഫ്യൂ തുടങ്ങി; കൊവിഡിനെതിരെ രാജ്യം ഒരുക്കുന്ന വന്‍ പ്രതിരോധം; വീട്ടിലിരുന്ന് ജനങ്ങള്‍

വയനാട്ടില്‍ അയല്‍ ജില്ലകളില്‍ നിന്നുള്ള യാത്രകള്‍ക്ക് കര്‍ശന നിയന്ത്രണങ്ങളാണ് ഏര്‍പ്പെടുത്തിയിരിക്കുന്നത്. ലക്കിടി, പേരിയ, ബോയ്‌സ് ടൗണ്‍ എന്നിവിടങ്ങളില്‍ പ്രത്യേക പരിശോധന സംഘങ്ങളെ നിയോഗിക്കാന്‍ ജില്ലാ പോലീസ് മേധാവിക്കും ഡിഎംഒയ്ക്കും നിര്‍ദ്ദേശം നല്‍കിയിട്ടുണ്ട്.