ഇടത് സ്ഥാനാർഥികൾ വിജയിച്ചാൽ മാത്രമേ നിലനിൽപ്പുള്ളൂ: എം.എം മണി

ഇടുക്കി: ഇടതു മുന്നണി സ്ഥാനാർഥികൾ വിജയിച്ചാൽ മാത്രമേ ഇന്ത്യ നിലനിൽക്കൂവെന്ന് എം.എം മണി. ഇടുക്കിയിൽ ഇടതു മുന്നണി സ്ഥാനാർഥി ജോയ്‌സ് ജോർജിന്റെ തെരഞ്ഞടുപ്പ് പ്രചാരണ യോഗത്തിൽ സംസാരിക്കുകയായിരുന്നു സംസ്ഥാന വൈദ്യുതി മന്ത്രി എം. എം മണി . ഐഎൻടിയുസി അഖിലേന്ത്യ ജനറൽ സെക്രട്ടറി അമർജിത്ത് കൗറും യോഗത്തിൽ സംബന്ധിച്ചു.

ജോയ്‌സ് ജോർജ് എംപി പ്രചാരണയോഗത്തിൽ സംബന്ധിക്കാതിരുന്നത് അണികൾക്കിടയിൽ അസംതൃപ്തിയുണ്ടക്കി. ഗോമാതാവിനെ പേരിൽ കോൺഗ്രസും ബിജെപിയും നടത്തുന്ന നാടകം അവസാനിപ്പിക്കണം. ഇരു പാർട്ടികളും തമ്മിലുള്ള കൂട്ടുകെട്ട് അവസാനിപ്പിക്കണമെങ്കിൽ ഇടത് നേതാക്കൾ ജയിക്കണമെന്നും എം.എം മണി പറഞ്ഞു.

നോട്ട് നിരോധനം, ജിഎസ്ടി തുടങ്ങിയ പരിഷ്‌കാരങ്ങൾ ജനങ്ങൾക്ക് ഗുണം ചെയ്തില്ല. മോദി സർക്കാർ വാഗ്ദാനം നൽകിയിരുന്നത് പോലെ സാധാരണ ജനങ്ങൾക്ക് 15 ലക്ഷം രൂപ ലഭിച്ചില്ലെന്നും എം.എം മണി ചൂണ്ടിക്കാട്ടി. ഇടതു മുന്നണി നടത്തുന്ന ചില സമരങ്ങളിലൂടെ മാത്രമാണ് സാധാരണക്കാർക്ക് എന്തെങ്കിലും ലഭിക്കുന്നതെന്ന് അമർജിത് കൗർ പറഞ്ഞു. മുഴുവൻ ഇടത് സ്ഥാനാർഥികളെയും വിജയിപ്പിക്കണമെന്ന് കൗർ ആഹ്വാനം ചെയ്തു.