ഡോളര്‍ കടത്ത് കേസ്: എം ശിവശങ്കറെ ഫെബ്രുവരി 9 വരെ റിമാൻഡ് ചെയ്തു

കൊച്ചി: ഡോളര്‍ കടത്തു കേസിൽ മുൻ പ്രിൻസിപ്പൽ സെക്രട്ടറി എം ശിവശങ്കറെ റിമാൻഡ് ചെയ്ത് കോടതി. ഫെബ്രുവരി 9 വരെയാണ് സാമ്പത്തിക കുറ്റകൃത്യങ്ങള്‍ക്കുള്ള അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതി എം ശിവശങ്കറെ റിമാൻഡ് ചെയ്തത്. കേസിൽ ശിവശങ്കര്‍ നല്‍കിയ ജാമ്യഹര്‍ജി ഫെബ്രുവരി ഒന്നാം തീയതി കോടതി പരിഗണിക്കും.

മുൻപ് സ്വര്‍ണക്കടത്തു കേസുമായി ബന്ധപ്പെട്ട് കസ്റ്റംസ് രജിസ്റ്റര്‍ ചെയ്ത കേസിൽ കോടതി ശിവശങ്കറിന് ജാമ്യം നല്‍കിയിരുന്നു. ഇതേസംഭവത്തിൽ ഇഡി രജിസ്റ്റര്‍ ചെയ്ത കേസിലും ശിവശങ്കറിന് ജാമ്യം ലഭിച്ചിട്ടുണ്ട്. കേസിൽ അറസ്റ്റിലായി മൂന്ന് മാസം പിന്നിടുമ്പോഴാണ് ശിവശങ്കറിന് ജാമ്യം ലഭിക്കുന്നത്.


Also Read: '4 വർഷത്തെ ഇടവേളക്ക് ശേഷം' ശശികല ജയിൽ മോചിതയായി; കൊവിഡ് ഭേദമായിട്ട് ചെന്നൈയിലേക്ക്

അതേസമയം, ഡോളര്‍ കടത്തുമായി ബന്ധപ്പെട്ട് നിയമസഭാ സ്പീക്കര്‍ പി ശ്രീരാമകൃഷ്ണനെ ചോദ്യം ചെയ്യാനുള്ള നീക്കത്തിലാണ് കസ്റ്റംസ്. സ്പീക്കറെ കസ്റ്റംസ് ചട്ടങ്ങള്‍ പ്രകാരം വിളിച്ചു വരുത്തി ചോദ്യം ചെയ്യുന്നതിന് നിയമതടസ്സങ്ങളില്ലെന്ന് നിയമോപദേശം ലഭിച്ചതായി റിപ്പോര്‍ട്ടുകളുണ്ട്. ഇതിനു പിന്നാലെയാണ് കസ്റ്റംസ് നടപടികള്‍ ആരംഭിച്ചത്. നിയമസഭാ സമ്മേളനം അവസാനിച്ച സാഹചര്യത്തിലാണ് സ്പീക്കറെ കസ്റ്റംസ് ചോദ്യം ചെയ്യുന്നത്.

Also Read: ഫലം കണ്ട് 'ആൻ്റിബോഡി കോക്ക്ടെയിൽ'; ലക്ഷണമുള്ള കൊവിഡ് രോഗികളിൽ 100% ഫലപ്രദം

യുഎഇ കോൺസുലേറ്റ് വഴി വിദേശത്തേയ്ക്ക് വൻതോതിൽ ഡോളര്‍ കടത്തിയെന്നാണ് കേസ്. സ്വര്‍ണക്കടത്ത് കേസിലെ പ്രതികളായ സ്വപ്ന സുരേഷ്, പിഎസ് സരിത്ത് എന്നിവരുടെ മൊഴിയുടെ അടിസ്ഥാനത്തിലാണ് പി ശ്രീരാമകൃഷ്ണനെതിരെ അന്വേഷണം.