പൾസർ സുനിയുടെ ജാമ്യഹർജി ഇന്ന് പരിഗണിക്കും

കൊച്ചി: നടിയെ അക്രമിച്ച കേസിൽ ഒന്നാം പ്രതിയായ പൾസർ സുനിയുടെ ജാമ്യാപേക്ഷ ഇന്ന് പരിഗണിക്കും. അങ്കമാലി മജിസ്ട്രേറ്റ് കോടതിയാണ് ജാമ്യഹർജി പരിഗണിക്കുന്നത്. പോലീസ് കുറ്റപത്രം സമർപ്പിച്ച സാഹചര്യത്തിൽ ജാമ്യം അനുവദിക്കണമെന്നാണ് സുനിയുടെ ആവശ്യം. അതിനിടെ, കഴിഞ്ഞ മാസം പോലീസ് സമർപ്പിച്ച അനുബന്ധ കുറ്റപത്രം റദ്ദാക്കണമെന്നാവശ്യപ്പെട്ട് ദിലീപ് സമര്‍ച്ച ഹര്‍ജിയും കോടതി ഇന്ന് പരിഗണിക്കും. കഴിഞ്ഞ മാസം 22 നാണ് ദിലീപിനെ എട്ടാം പ്രതിയാക്കി കുറ്റപത്രം സമര്‍പ്പിച്ചത്.

കുറ്റപത്രം ഫയലില്‍ സ്വീകരിക്കുന്നതിന് മുന്‍പ് പൊലീസ് മാധ്യമങ്ങള്‍ക്ക് ചോര്‍ത്തി നല്‍കിയെന്നാണ് ഹര്‍ജിയിലെ ആരോപണം. കുറ്റപത്രമല്ല കരട് രേഖ മാത്രമാണ് ചോര്‍ന്നതെന്നാണ് പൊലീസ് കോടതിയില്‍ നല്‍കിയ വിശദീകരണം. പകര്‍പ്പെടുക്കാന്‍ നല്‍കിയപ്പോള്‍ മാധ്യമങ്ങള്‍ ഇത് ചോര്‍ത്തുകയായിരുന്നുവെന്നാണ് പൊലീസ് കോടതിയില്‍ അറിയിച്ചത്. കുറ്റപത്രത്തിൽ നടിയെ ആക്രമിക്കാൻ ദിലീപ് ക്വട്ടേഷന്‍ നല്‍കിയതിന്‍റെ കാരണങ്ങൾ വ്യക്തമാക്കുന്നുണ്ട്. ഒന്നാം പ്രതിയായ പൾസർ സുനിക്കെതിരെ ചാർത്തിയിരിക്കുന്ന കുറ്റങ്ങൾ തന്നെയാണ് എട്ടാം പ്രതിയായ ഡീലീപിനെതിരെയും ചുമത്തിയിരിക്കുന്നത്.