8930 രോഗബാധിതര്‍
സംസ്ഥാനത്ത് ഇതുവരെ 8930 പേര്‍ക്കാണ് രോഗം സ്ഥിരീകരിച്ചത്. നിലവിൽ ചികിത്സയിലുള്ളത് 4454 പേരാണ് ചികിത്സയിലുള്ളത്. കഴിഞ്ഞ 24 മണിക്കൂറിനുള്ളിൽ 14227 സാമ്പിളുകളാണ് പരിശോധിച്ചത്. 180594 പേരാണ് നിരീക്ഷണത്തിലുള്ളത്. 4376 പേര് ആശുപത്രികളിലാണുള്ളത്. ഇന്ന് മാത്രം 720 പേരെ ആശുപത്രിയിൽ പ്രവേശിപ്പിച്ചു. ഇതുവരെ 2,52,302 സാമ്പിളുകളാണ് പരിശോധനയ്ക്കായി അയച്ചത്. ഇതിൽ 7745 സാമ്പിളുകളുടെ പരിശോധന ഫലം വരാനുണ്ട്. ഇത് കൂടാതെ സെന്റിനൽ സര്‍വയലൻസിന്റെ ഭാഗമായി മുന്‍ഗണനാ ഗ്രൂപ്പുകളില്‍ നിന്നും 79723 സാമ്പിളുകള്‍ ശേഖരിച്ചു. അതിൽ 75,338 സാമ്പിളുകള്‍ നെഗറ്റീവായി.
ജില്ല തിരിച്ചുള്ള കണക്കുകള്‍
പോസിറ്റീവായവരുടെ ജില്ലതിരിച്ചുള്ള കണക്കുള്‍ ഇങ്ങനെ, തിരുവനന്തപുരം 201, എറണാകുളം 70, മലപ്പുറം 58, കോഴിക്കോട് 58, കാസര്‍കോട് 44, തൃശ്ശൂര്‍ 42, ആലപ്പുഴ 34, പാലക്കാട് 26, കോട്ടയം 25, കൊല്ലം 23, വയനാട് 12, കണ്ണൂർ 12, പത്തനംതിട്ട മൂന്ന്.
151 പേര്‍ക്ക് രോഗമുക്തി ഇവരുടെ ജില്ല തിരിച്ചുള്ള കണക്കുള്‍ ഇങ്ങനെ, തിരുവനന്തപുരം 15 കൊല്ലം രണ്ട്, ആലപ്പുഴ 17, കോട്ടയം 5, തൃശ്ശൂർ 9, പാലക്കാട് 49, മലപ്പുറം 9, കോഴിക്കോട് 21, കണ്ണൂർ 49, കാസർകോട് 5.
കൊവിഡ് മരണം
സംസ്ഥാനത്ത് ഇന്ന് ഒരു കൊവിഡ് മരണം കൂടി സ്ഥിരീകരിച്ചു. ആലപ്പുഴ വണ്ടാനം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ച ചുനക്കര സ്വദേശി നസീറിന്റെ കൊവിഡ് പരിശോധന ഫലമാണ് പോസിറ്റീവായത്. ഈ മാസം ആദ്യമാണ് നസീർ സൗദിയിൽ നിന്ന് തിരിച്ചെത്തിയത്. ഇന്നലെ സംസ്ഥാനത്ത് രണ്ട് കൊവിഡ് മരണങ്ങളാണ് റിപ്പോര്‍ട്ട് ചെയ്തത്.
ആശങ്കയായി ചെല്ലാനം, പുതിയ 35 കേസുകള്‍
എറണാകുളം ജില്ലയിൽ ഇന്നലെ പുറത്തുവിടാത്ത 35 കേസുകള്‍ കൂടി ഇന്ന് പുറത്തുവിട്ടു. ചെല്ലാനത്തു നിന്നുള്ള 35 കേസുകളാണ് ഇപ്പോള്‍ പുറത്തു വിട്ടിരിക്കുന്നത്. മന്ത്രി വി.എസ് സുനിൽ കുമാ‍റാണ് ഇന്ന് രാവിലെ ഇക്കാര്യം വ്യക്തമാക്കിയത്. ഡാറ്റാ എന്‍ട്രി സ്റ്റാഫിന് കൊവിഡ് രോഗബാധ സ്ഥിരീകരിച്ചതിനെ തുടര്‍ന്ന് ഉണ്ടായ സാങ്കേതിക തടസ്സമാണ് കാരണമാണ് ഇന്നലെ ഈ കണക്ക് പുറത്തു വിടാത്തത് എന്നും മന്ത്രി വ്യക്തമാക്കി. ഇതിന് പുറമെ, എറണാകുളം ജനറൽ ആശുപത്രിയിലെ ഡോക്ടര്‍ക്കും കൊവിഡ് രോഗബാധ സ്ഥിരീകരിച്ചു. മാനസികാരോഗ്യ വിഭാഗത്തിലെ ഡോക്ടർക്കാണ് കൊവിഡ് രോഗബാധ കണ്ടെത്തിയിരിക്കുന്നത്.
51 ക്ലസ്റ്ററുകൾ 2 ലാർജ് ക്ലസ്റ്ററുകള്‍
സംസ്ഥാനത്ത് രോഗികളുടെ എണ്ണം വലിയ തോതിൽ വര്‍ദ്ധിച്ചതോടെ കേരളത്തിൽ ഇതുവരെ 51 ക്ലസ്റ്ററാണ് രൂപപ്പെട്ടിരിക്കുന്നത് എന്ന് ആരോഗ്യവകുപ്പ് വ്യക്തമാക്കി. ഇതിൽ 15 ക്ലസ്റ്ററുകളില്‍ രോഗം നിയന്ത്രണ വിധേയമാണെന്നാണ് ആരോഗ്യവകുപ്പ് റിപ്പോര്‍ട്ടിൽ പറയുന്നത്. തിരുവനന്തപുരത്തെ പൂന്തുറ, മലപ്പുറത്തെ പൊന്നാനി എന്നിവയാണ് സംസ്ഥാനത്തെ ലാര്‍ജ് കമ്യൂണിറ്റി ക്ലസ്റ്ററുകള്‍. ഇവിടങ്ങളില്‍ സമ്പര്‍ക്കത്തിലൂടെ അമ്പതിലധികം പേര്‍ക്കാണ് രോഗപ്പകര്‍ച്ചയുണ്ടായത്.
രാജ്യത്ത് കൊവിഡ് കേസുകൾ 9 ലക്ഷം കടന്നു
രാജ്യത്തെ കൊവിഡ് കേസുകളിൽ വര്‍ദ്ധനവ് തുടരുന്നു. ഇന്നലെ മാത്രം 28,498 പേര്‍ക്കാണ് കൊവിഡ് രോഗബാധ കണ്ടെത്തിയിരിക്കുന്നത്. ഇതോടെ രാജ്യത്ത് കൊവിഡ് ബാധ റിപ്പോര്‍ട്ട് ചെയ്തിരിക്കുന്ന ആളുകളുടെ എണ്ണം 9,06,752 ആയി ഉയര്‍ന്നു. മഹാരാഷ്ട്ര, ഡല്‍ഹി, തമിഴ്‌നാട് എന്നീ സംസ്ഥാനങ്ങളില്‍ നിന്നുമാണ് ഏറ്റവും അധികം രോഗികളുള്ളത്.