കൊറോണ; അപകീര്‍ത്തി പ്രചാരണത്തിനെതിരെ പരാതിയുമായി പ്രവാസി

മലപ്പുറം:കൊറോണ വൈറസ് ബാധയുടെ പശ്ചാത്തലത്തില്‍ ഖത്തറില്‍ നിന്നും എത്തി സ്വയം നിരീക്ഷണത്തില്‍ കഴിയുന്ന യുവാവ് പരാതിയുമായി രംഗത്ത്. തന്നെയും കുടുംബത്തേയും അപകീര്‍ത്തിപ്പെടുത്തുന്ന തരത്തില്‍ സമൂഹമാധ്യമങ്ങളില്‍ അടക്കം വ്യാജ പ്രചാരണം നടത്തുന്നതിനെതിരെയാണ് യുവാവിന്റെ പരാതി. മലപ്പുറം അരിയല്ലൂര്‍ സ്വദേശിയായ യുവാവ് ഇക്കാര്യം ചൂണ്ടിക്കാട്ടി പരപ്പനങ്ങാടി പോലീസിന് പരാതി നല്‍കി.

മാര്‍ച്ച് 15നാണ് യുവാവ് ഖത്തറില്‍ നിന്നും കരിപ്പൂര്‍ വിമാനത്താവളം വഴി നാട്ടില്‍ എത്തിയത്. രോഗ ലക്ഷണങ്ങള്‍ ഇല്ലാത്തതിനെ തുടര്‍ന്ന് 14 ദിവസം വീട്ടില്‍ സ്വയം നിരീക്ഷണത്തില്‍ കഴിയണമെന്ന് നിര്‍ദ്ദേശിച്ച് ആരോഗ്യ വകുപ്പ് അധികൃതര്‍ പറഞ്ഞയക്കുകയായിരുന്നു. ഇതനുസരിച്ച് യുവാവ് വീട്ടുകാരോട് മാറി നില്‍ക്കാന്‍ ആവശ്യപ്പെടുകയായിരുന്നു.

Also Read: മാസ്‌ക് ഇട്ടതോടെ ഹിന്ദു-ക്രിസ്ത്യൻ-മുസ്ലീം തിരിച്ചറിയില്ല! പൊളി സാനമെന്ന് ബിബിൻ

എന്നാല്‍ ഖത്തറില്‍ നിന്നും മകന്‍ എത്തിയപ്പോള്‍ മാതാപിതാക്കള്‍ വീടുവിട്ടിറങ്ങി എന്ന തരത്തില്‍ സമൂഹമാധ്യമങ്ങളിലടക്കം വാര്‍ത്ത പ്രചരിച്ചിരുന്നു. ഇതോടെ കടുത്ത മാനസിക സമ്മര്‍ദ്ദത്തിലാണ് യുവാവും കുടുംബവും. തുടര്‍ന്ന് ഇവര്‍ പോലീസില്‍ പരാതി നല്‍കാന്‍ തീരുമാനിക്കുകയായിരുന്നു.