ജര്‍മനി യാത്ര: മന്ത്രി രാജുവിനെ തള്ളി സിപിഐ

തിരുവനന്തപുരം: പ്രളയക്കെടുതിയ്ക്കിടെയിൽ ജര്‍മനി യാത്ര നടത്തിയ മന്ത്രി രാജുവിന്‍റെ നിലപാട് തള്ളി സിപിഐ. മന്ത്രിയ്ക്ക് സംഭവിച്ചത് തെറ്റു തന്നെയാണെന്നും കൂടുതൽ ന്യായീകരിച്ച് വഷളാക്കേണ്ടെന്നും പാര്‍ട്ടി നിര്‍ദേശിച്ചതായി റിപ്പോര്‍ട്ടുകളുണ്ട്. മന്ത്രി രാജിവെച്ചേക്കുമെന്നും റിപ്പോര്‍ട്ടുകള്‍ പുറത്തുവരുന്നുണ്ട്.

വിദേശയാത്ര നടത്തിയതിൽ തെറ്റില്ലെന്ന മന്ത്രിയുടെ നിലപാട് സിപിഐ തള്ളിക്കളഞ്ഞു. ഇങ്ങനെയൊരു സാഹചര്യത്തിൽ മന്ത്രി വിദേശത്തേയ്ക്ക് പോകരുതായിരുന്നുവെന്ന് പാര്‍ട്ടി സംസ്ഥാന സെക്രട്ടറി കാനം രാജേന്ദ്രനും അഭിപ്രായപ്പെട്ടിരുന്നു.

അതേസമയം, മന്ത്രി കെ രാജുവിന്‍റെ വിദേശയാത്ര ചട്ടങ്ങള്‍ പാലിക്കാതെതായിരുന്നുവെന്നും റിപ്പോര്‍ട്ടുകള്‍ പുറത്തുവന്നു. ഒരു മന്ത്രി സ്ഥലത്തില്ലാത്തിരിക്കേ മറ്റൊരു മന്ത്രിയ്ക്ക് ചുമതല കൈമാറാനുള്ള അധികാരം മുഖ്യമന്ത്രിയ്ക്കാണെന്നിരിക്കേ മന്ത്രി പി തിലോത്തമന് ചുമതല കൈമാറിയത് മുഖ്യമന്ത്രിയുടെ ഓഫീസിനെ അറിയിച്ചിട്ടില്ലെന്നാണ് സൂചന.

താൻ വിദേശയാത്ര നടത്താൻ മുൻകൂട്ടി അനുവാദം വാങ്ങിയിരുന്നുവെന്നും യാത്ര പുറപ്പെടുമ്പോള്‍ മഴയുണ്ടായിരുന്നില്ലെന്നും മന്ത്രി കെ രാജു മാധ്യമങ്ങളോട് വിശദീകരിച്ചിരുന്നു. കോട്ടയം ജില്ലയിലെ ദുരിതാശ്വാസപ്രവര്‍ത്തനങ്ങള്‍ ഏകോപിപ്പിക്കാൻ തനിക്ക് ചുമതലയുണ്ടായിരുന്നുവെന്നും എന്നാൽ വിദേശയാത്ര നടത്തിയത് തെറ്റായിപ്പോയെന്ന് കരുതുന്നില്ലെന്നുമായിരുന്നു മന്ത്രിയുടെ ന്യായീകരണം.