ഭരണത്തുടർച്ച പ്രവചിച്ച് സിപിഐ
എണ്‍പതില്‍ അധികം സീറ്റുകള്‍ നേടി എല്‍ഡിഎഫ് വീണ്ടും അധികാരത്തിലെത്തുമെന്ന് എക്‌സിക്യൂട്ടീവ് വിലയിരുത്തിയത്. നിയമസഭാ തെരഞ്ഞെടുപ്പിന് ശേഷം ചേർന്ന സിപിഐ സംസ്ഥാന എക്‌സിക്യൂട്ടീവ് യോഗത്തിലാണ് ഈ നിഗമനം ഉണ്ടായത്. ജില്ലാ നേതൃത്വങ്ങളിൽ നിന്നുള്ള വിശദമായ റിപ്പോർട്ടിൻ്റെ അടിസ്ഥാനത്തിലാണ് സിപിഐ വിലയിരുത്തൽ നടത്തിയത്. വോട്ടെടുപ്പുമായി ബന്ധപ്പെട്ട കാര്യങ്ങളിൽ വിശദമായ ചർച്ച നടത്തി. തൃശൂരും കരുന്നാഗപ്പള്ളിയിലും കനത്ത മത്സരം നടന്നുവെന്നും അവലോകന യോഗത്തിൽ സിപിഐ വിലയിരുത്തിയിരുന്നു.
തിരൂരങ്ങാടിയിലെ സിപിഐയുടെ വാദം തള്ളി ലീഗ്
മുസ്ലീം ലീഗിന്‍റെ കോട്ടയെന്ന് വിശേഷണമുള്ള മലപ്പുറത്തെ തിരൂരങ്ങാടിയിൽ അട്ടിമറി വിജയം നേടുമെന്ന സിപിഐയുടെ വിലയിരുത്തൽ തള്ളി മുസ്ലീം ലീഗ് രംഗത്തുവന്നു. എന്ത് പ്രതീക്ഷയിലാണ് സിപിഐയുടെ വിലയിരുത്തലെന്ന് അറിയില്ലെന്ന് മുസ്ലീം ലീഗ് നേതാവ് കെപി എ മജീദ് ഏഷ്യാനെറ്റ് ന്യൂസിനോട് വ്യക്തമാക്കി. മണ്ഡലത്തിൽ വിജയിക്കുമെന്ന ചിന്തയോ അഭിപ്രായമോ തിരൂരങ്ങാടിയിലെ സഖാക്കള്‍ക്ക് പോലുമില്ല. ഇത്തരത്തിലാണ് വിലയിരുത്തൽ നടത്തിയതെങ്കിൽ സിപിഐ വലിയ അപകടത്തിലേക്കാകും എത്തുക. ഇത്തവണ സിപിഐ കനത്ത പരാജയം ഏറ്റുവാങ്ങും. അവരുടെ സ്ഥിതി ദയനീയമാണെന്നും അദ്ദേഹം പരിഹസിച്ചു.
ജോസിൻ്റെ വരവിൻ്റെ ഇടതുമുന്നണിക്ക് നേട്ടമായി
യുഡിഎഫ് വിട്ട് ജോസ് കെ മാണി വിഭാഗം ഇടതുമുന്നണിയിൽ എത്തിയത് ഇത്തവണത്തെ നിയമസഭാ തെരഞ്ഞെടുപ്പിൽ നേട്ടമാകുമെന്ന് സിപിഐ വിലയിരുത്തി. കോട്ടയം ജില്ലയിലെ സാധ്യതകൾ വർധിപ്പിക്കാൻ ഇത് കാരണമായി. കേരളാ കോൺഗ്രസ് മുന്നണിയിൽ എത്തിയതോടെ കോട്ടയം ജില്ലയിൽ എൽഡിഎഫിന് അഞ്ച് സീറ്റുകൾ വരെ നേടാൻ കഴിഞ്ഞേക്കുമെന്നും സിപിഐ വിലയിരുത്തി. 2016ലെ നിയമസഭാ തെരഞ്ഞെടുപ്പിൽ കോട്ടയം ജില്ലയിൽ രണ്ടിടത്ത് മാത്രമാണ് എൽഡിഎഫിന് വിജയിക്കാനായത്.
പാലാ ജോസ് കെ മാണിക്കൊപ്പം നിൽക്കും
സംസ്ഥാനത്ത് ഏറ്റവും വാശിയേറിയ മത്സരം നടക്കുന്ന മണ്ഡലങ്ങളിൽ ഒന്നായ പാലായിൽ ജോസ് കെ മാണി വിജയിക്കുമെന്ന് സിപിഐ വ്യക്തമാക്കി. നേരിയ ഭൂരിപക്ഷത്തിലാകും പാലായിലെ വിജയം. പാലായ്‌ക്ക് പുറമെ കാഞ്ഞിരപ്പള്ളിയും ചങ്ങനാശേരിയും ഇടതിനൊപ്പം നിൽക്കുമെന്നും വിലയിരുത്തലുണ്ടായി. ഇടതുമുന്നണി വിട്ട് യുഡിഎഫിൽ എത്തിയ മാണി സി കാപ്പനും ജോസ് കെ മാണിയും നേർക്കുനേർ എത്തുന്ന പാലായിലെ തെരഞ്ഞെടുപ്പ് ഫലം ആശങ്കയുയർത്തുന്നതാണ്. മണ്ഡലത്തിൽ ശക്തമായ മത്സരമാണ് ഇത്തവണ നടന്നതെന്ന വിലയിരുത്തലാണ് ഇടത് - വലത് മുന്നണികൾക്കുള്ളത്.
ചിത്രത്തിന് കടപ്പാട്: Jose K mani/KPA majeed/kanam rajendran - Facebook