മൂന്നാര്‍ ഹര്‍ത്താലിനില്ലെന്ന് സിപിഐ നോട്ടീസ്

മൂന്നാര്‍: മൂന്നാര്‍ സംരക്ഷണസമിതി നടത്തുന്ന ചൊവ്വാഴ്ചത്തെ ഹര്‍ത്താലിനെ പിന്തുണയ്ക്കുന്നില്ലെന്നു കാണിച്ച് സിപിഐയുടെ നോട്ടീസ്. സിപിഐ മണ്ഡലം സെക്രട്ടറി പി പളനിവേലിന്‍റെ പേരിലാണ് സിപിഎമ്മിനെ പേരെടുത്തു വിമര്‍ശിക്കുന്ന നോട്ടീസ്.

മൂന്നാര്‍ പ്രദേശത്തെ 10 പഞ്ചായത്തുകളിലാണ് ചൊവ്വാഴ്ച മൂന്നാര്‍ സംരക്ഷണസമിതിയും സിപിഎമ്മും ഹര്‍ത്താലിന് ആഹ്വാനം ചെയ്തിരിക്കുന്നത്. ആരെ സംരക്ഷിക്കാനാണ് ഹ‍ര്‍ത്താാലെന്നും ഹര്‍ത്താല്‍ കൊണ്ട് ബുദ്ധിമുട്ടുന്നത് സാധാരണക്കാരും ചെറുകിട കച്ചവടക്കാരുമാണെന്നും കയ്യേറ്രലോബിയെ സംരക്ഷിക്കാനുള്ള ശ്രമമാണ് ഹര്‍ത്താലിനു പിന്നിലെന്നും സിപിഐ നോട്ടീസിൽ ആരോപിക്കുന്നു.

കഴിഞ്ഞ എൽഡിഎഫ് സര്‍ക്കാരിന്‍റെ കാലത്ത് ഭൂരഹിതര്‍ക്കും തോട്ടം തൊഴിലാളികള്‍ക്കും നല്‍കാനായി വട്ടവട, കൊട്ടക്കൊമ്പൂര്‍, കീഴാന്തൂര്‍, കാന്തല്ലൂര്‍ വില്ലേജുകളിൽ അവന്യൂ വകുപ്പ് ഏറ്റെടുത്ത ഭൂമിയിൽ പലതും കയ്യേറ്റലോബിയുടെ കൈവശമാണ്. ഇതിനെ പിന്തുണയ്ക്കുന്ന പല രാഷ്ട്രീയക്കാരുമാണ് പട്ടയമേളയെ എതിര്‍ക്കുന്നതെന്നും ഇവരാണ് റവന്യൂ വകുപ്പിനെതിരായ ഹര്‍ത്താലിനു പിന്നിലെന്നും നോട്ടീസിൽ ആരോപണമുണ്ട്.