നടൻ അശോകൻ മത്സരിക്കാനില്ലെന്ന് പന്ന്യൻ രവീന്ദ്രൻ

കൊച്ചി : നടന്‍ അശോകന്‍ നിയമസഭാ തെരഞ്ഞെടുപ്പിലേയ്‌ക്ക് മത്സരിക്കുന്നുവെന്ന വാര്‍ത്തകള്‍ നിഷേധിച്ച്‌ പാര്‍ട്ടി നേതൃത്വം രംഗത്ത്. സിപിഐ ദേശീയ എക്‌സിക്യൂട്ടിവ്‌ അംഗം പന്ന്യന്‍ രവീന്ദ്രനാണ്‌ ഇക്കാര്യത്തില്‍ പാര്‍ട്ടിയുടെ നിലപാട് അറിയിച്ചത്.

അശോകനെ സ്‌ഥാനാര്‍ത്ഥിയാക്കുന്ന കാര്യം പാര്‍ട്ടി ചര്‍ച്ച ചെയ്‌തിട്ടില്ല. ഹരിപ്പാട്‌ മത്സരിക്കാന്‍ ആഗ്രഹമുണ്ടെന്ന്‌ അശോകന്‍ താത്‌പര്യപ്പെട്ടിരുന്നു. എന്നാല്‍ താത്പര്യപ്പെടുന്ന എല്ലാവര്‍ക്കും സീറ്റ് നല്‍കാനാവുന്ന അവസ്ഥയല്ലല്ലോ എന്നും പന്ന്യൻ രവീന്ദ്രന്‍ പറഞ്ഞു.

'ഇൻ ഹരിഹര്‍ നഗര്‍' എന്ന ചിത്രത്തിലെ പ്രധാന കഥാപാത്രങ്ങളെപ്പോലെ തന്നെ മുകേഷും ജഗദീഷും സിദ്ദിഖും അശോകനും കളിക്കളത്തിലിറങ്ങുമെന്ന് സാമൂഹ്യമാധ്യമങ്ങളില്‍‍ തമാശകള്‍ ഇറങ്ങിയിരുന്നു. എന്നാല്‍ സിപിഐയുടെ പിന്തുണയില്‍ അശോകൻ മത്സരിക്കാനുള്ള സാധ്യത കൂടുതല്‍ തെളിഞ്ഞു വന്നതോടെയാണ് പാര്‍ട്ടി തന്നെ വിശദീകരണവുമായി രംഗത്തെത്തിയിരിക്കുന്നത്.