എം സ്വരാജിനെതിരെ രൂക്ഷവിമര്‍ശനവുമായി സിപിഐ

കൊച്ചി: തൃപ്പൂണിത്തുറയിൽ നിന്നുള്ള സിപിഎം എംഎൽഎ എം സ്വരാജിനെതിരെ രൂക്ഷവിമര്‍ശനവുമായി സിപിഐ. എം സ്വരാജ് അഹങ്കാരത്തിന്‍റെ ആള്‍രൂപമാണെന്നാണ് സിപിഐ ജില്ലാ സമ്മേളനത്തിൽ അവതരിപ്പിച്ച പ്രവര്‍ത്തന റിപ്പോര്‍ട്ടിലെ വിമര്‍ശനം. സ്വരാജിനു പുറമെ ജില്ലയിലെ മറ്റ് സിപിഎം എംഎൽഎമാര്‍ക്കും സംസ്ഥാന സര്‍ക്കാരിനും റിപ്പോര്‍ട്ടിൽ വിമര്‍ശനമുണ്ട്.

സിപിഎം എംഎൽഎമാര്‍ക്ക് സിപിഐയുടെ വോട്ട് വേണമെന്നും എന്നാൽ പാര്‍ട്ടിയെ അംഗീകരിക്കാൻ മടിയാണെന്നുമാണ് വിമര്‍ശനം. നിസ്സാരവോട്ടിനു ജയിച്ച കെ ജെ മാക്സി എംഎൽഎയ്ക്ക് ഇപ്പോള്‍ സിപിഐയെ കണ്ടഭാവമില്ല. മാക്സി ജനജാഗ്രതായാത്രയുടെ സ്വീകരണസമ്മേളനത്തിൽ നിന്ന് വിട്ടുനിന്ന് സിപിഐയെ അധിക്ഷേപിച്ചുവെന്നും റിപ്പോര്‍ട്ട് പറയുന്നു.

ജില്ലയിലെ സിപിഎമ്മിൻ്റെ മുതിർന്ന നേതാക്കളിലൊരാളായ വൈപ്പിൻ എംഎൽഎ എസ്. ശർമയ്ക്കും കോതമംഗലം എംഎൽഎ ആൻ്റണി ജോണിനും റിപ്പോര്‍ട്ടിൽ വിമർശനമുണ്ട്. ജില്ലയില്‍ പതിനൊന്ന് നിയമസഭ സീറ്റിൽ മൽസരിക്കാനുള്ള അർഹത സിപിഎമ്മിനില്ലെന്നും റിപ്പോര്‍ട്ട് പറയുന്നു.