രാമായണമാസം ആചരണം: സിപിഎം കേന്ദ്രനേതൃത്വത്തിന് എതിര്‍പ്പ്

ന്യൂഡൽഹി കര്‍ക്കടകമാസത്തിൽ രാമായാണമാസം ആചരിക്കാനുള്ള സിപിഎം സംസ്ഥാനനേതൃത്വത്തിന്‍റെ തീരുമാനത്തിൽ പാര്‍ട്ടിയ്ക്കുള്ളിൽ കല്ലുകടി. തീരുമാനം കേന്ദ്രനേതൃത്വത്തിന്‍റെ അറിവോടെയല്ലെന്നാണ് സൂചന. പാര്‍ട്ടിയുടെ സംസ്ഥാനഘടകം സ്വീകരിച്ച തീരുമാനത്തിൽ കേന്ദ്രനേതൃത്വം അതൃപ്തി പ്രകടിപ്പിച്ചതായി മാതൃഭൂമിയാണ് റിപ്പോര്‍ട്ട് ചെയ്തത്.

പത്രങ്ങളിൽ നിന്നും മറ്റു മാധ്യമങ്ങളിൽ നിന്നുമാണ് കേന്ദ്രനേതാക്കളിൽ പലരും വിവരം അറിഞ്ഞതെന്ന് റിപ്പോര്‍ട്ടിൽ പറയുന്നു. ഇന്ന് ന്യൂഡൽഹിയിൽ ചേര്‍ന്ന അവൈലബിള്‍ പിബി വിഷയം ചര്‍ച്ച ചെയ്തിരുന്നു. വിഷയത്തിൽ സംസ്ഥാനനേതാക്കളിൽ നിന്ന് പാര്‍ട്ടി വിശദീകരണം തേടിയേക്കും.

ബിജെപിയെ ചെറുക്കുന്നതിന്‍റെ ഭാഗമായാണ് രാമായണമാസത്തിൽ സെമിനാറുകള്‍ ഉള്‍പ്പെടെയുള്ള പരിപാടികള്‍ സംഘടിപ്പിക്കാൻ സിപിഎം സംസ്ഥാനനേതൃത്വം ഒരുങ്ങിയത്. രാമായണത്തിന്‍റെ പുനര്‍വായന എന്ന രീതിയിൽ പരിപാടി സംഘടിപ്പിക്കാനായിരുന്നു ആലോചന. എന്നാൽ ഇത് തെറ്റിദ്ധാരണയ്ക്ക് ഇടയാക്കുമെന്നാണ് കേന്ദ്രനേതൃത്വത്തിൻ്റെ ആശങ്ക. അതുകൊണ്ട് പാര്‍ട്ടി ഇത്തരത്തിൽ ഒരു തീരുമാനത്തിലേയ്ക്ക് കടക്കേണ്ടതില്ലെന്നാണ് കേന്ദ്രനേതൃത്വത്തിൻ്റെ നിലപാട്.