ദുരിതാശ്വാസനിധിയിലേക്ക് സിപിഎം സമാഹരിച്ചത് 16.5 കോടി

തിരുവനന്തപുരം: സംസ്ഥാനത്ത് പ്രളയബാധിതരെ സഹായിക്കുന്നതിനായി സിപിഎം സമാഹരിച്ചത് 16.5 കോടി രൂപ. ദുരന്തം വലിയ തോതില്‍ നാശനഷ്ടമുണ്ടാക്കിയ എറണാകുളം, ഇടുക്കി, ആലപ്പുഴ, പത്തനംതിട്ട എന്നീ ജില്ലകളെയും തൃശൂര്‍, കോട്ടയം ജില്ലകളിലെ ചില പ്രദേശങ്ങളെയും ഒഴിവാക്കിയാണ് ധനശേഖരണം നടത്തിയത്. തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറുമെന്ന് സിപിഎം സംസ്ഥാന സെക്രട്ടേറിയറ്റ് വാര്‍ത്താക്കുറിപ്പിലൂടെ അറിയിച്ചു.

ഓഗസ്റ്റ് 18,19 തീയതികളില്‍ ജനങ്ങള്‍ക്കിടയില്‍ നടത്തിയ ധനശേഖരണത്തിലൂടെയാണ് 16,43,73,940 രൂപ സിപിഎം പിരിച്ചെടുത്തിരിക്കുന്നത്. കണ്ണൂരില്‍ നിന്ന് മാത്രം ആറരക്കോടി രൂപയാണ് സമാഹരിച്ചത്. സംഭാവന നല്‍കിയ മുഴുവന്‍ ജനങ്ങള്‍ക്കും സിപിഎം നന്ദി അറിയിച്ചു. ബക്കറ്റ് പിരിവുകള്‍ക്കെതിരെ വന്‍ പ്രചാരണം നടക്കുന്നതിനിടെയാണ് കൃത്യമായ കണക്ക് അവതരിപ്പിച്ച് സിപിഎം വന്‍തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറുന്നത്.

ധനസമാഹരണത്തിന്‍റെ ജില്ല തിരിച്ചുള്ള കണക്ക്

കാസര്‍കോഡ് 1,25,19,688
കണ്ണൂര്‍ 6,39,69,320
വയനാട് 10,00,000
കോഴിക്കോട് 1,26,00,000
മലപ്പുറം 1,20,00,000
പാലക്കാട് 1,37,44,397
തൃശൂർ 65,00,000
കോട്ടയം 44,00,000
കൊല്ലം 1,51,00,000
തിരുവനന്തപുരം 2,25,40,535.