കോൺഗ്രസ് ശക്തിപ്പെടുന്നു
നിയമസഭാ തെരഞ്ഞെടുപ്പിൽ വിജയിക്കാൻ കഴിഞ്ഞില്ലെങ്കിലും കോൺഗ്രസ് നേതൃത്വം നല്‍കുന്ന യുഡിഎഫ് ദുര്‍ബലമായിട്ടില്ലെന്നാണ് സിപിഎം വിലയിരുത്തൽ. മുന്നണിയുടെ വോട്ടുവിഹിതം 2016നെ അപേക്ഷിച്ച് അൽപം വര്‍ധിക്കുകയാണ് ഉണ്ടായതെന്നും മുന്നണിയുടെ ശക്തി അംഗീകരിക്കണമെന്നും സിപിഎം സംസ്ഥാന സമിതി കീഴ്ഘടകങ്ങളോടു നിര്‍ദേശിച്ചു. വിവാദമായ ഡിസിസി പട്ടികയ്ക്കു പിന്നാലെ കെപിസിസിയിലും ഐഐസിസിയിലും കോൺഗ്രസ് വലിയ അഴിച്ചുപണിയ്ക്ക് ഒരുങ്ങുന്നതിനിടയിലാണ് നിര്‍ദേശം. ഗ്രൂപ്പിസം പരമാവധി കുറച്ച് പാര്‍ട്ടി സംഘടനാ സംവിധാനം ശക്തിപ്പെടുത്താനുള്ള ശ്രമത്തിലാണ് കോൺഗ്രസ്. മുതിര്‍ന്ന നേതാക്കളുടെ എതിര്‍പ്പിനിടയിലും ആറുമാസത്തിനകം ഈ നടപടികള്‍ പൂര്‍ത്തിയാക്കാനാണ് കോൺഗ്രസ് ലക്ഷ്യമിടുന്നത്. കോൺഗ്രസിനുള്ളിൽ വരുന്ന മാറ്റങ്ങള്‍ വരുന്ന നിയമസഭാ തെരഞ്ഞെടുപ്പിൽ യുഡിഎഫിനെ ശക്തിപ്പെടുത്തിയേക്കുമന്നുള്ള വിലയിരുത്തൽ സിപിഎമ്മിനുള്ളിലുണ്ട്.
ന്യൂനപക്ഷങ്ങളെ അടുപ്പിക്കണം
ന്യൂനപക്ഷ സമുദായങ്ങള്‍ക്കിടയിലും സ്വാധീനമുറപ്പിക്കണമെന്ന നിര്‍ദേശവും സിപിഎം നല്‍കിയിട്ടുണ്ട്. മുസ്ലീം വിഭാഗത്തിനു വലിയ സ്വാധീനമുള്ള മുസ്ലീം ലീഗ് യുഡിഎഫിൻ്റെ ഭാഗമാണ്. എന്നാൽ അടുത്തിടെ മുസ്ലീം വിഭാഗത്തിൽ നിന്ന് ഏറെ പേര്‍ സിപിഎമ്മിനോടു അടുത്തിട്ടുണ്ടെന്നും ഇവരെ പാര്‍ട്ടി കേഡര്‍മാരാക്കണമെന്നും സിപിഎം നിര്‍ദേശിച്ചു. ക്രിസ്ത്യൻ വിഭാഗത്തിൽ നിന്നും കൂടുതൽ പ്രവര്‍ത്തകരെ കണ്ടെത്താനും സിപിഎം പദ്ധതിയിടുന്നുണ്ട്. യുഡിഎഫിനെ അനുകൂലിക്കുന്ന വിഭാഗങ്ങളെ ആകര്‍ഷിച്ച് പാര്‍ട്ടിയുടെ അടിത്തറ വിപുലപ്പെടുത്താനാണ് അണികള്‍ക്ക് സംസ്ഥാന സമിതിയുടെ നിര്‍ദേശം.
ബിജെപിയ്ക്കെതിരെ ജാഗ്രത
ബിജെപിയ്ക്കെതിരെയും സിപിഎം അണികള്‍ക്ക് ജാഗ്രതാ നിര്‍ദേശം നല്‍കിയിട്ടുണ്ട്. കേന്ദ്രത്തിലെ അധികാരവും സാമ്പത്തികശക്തിയും ഉപയോഗിച്ച് ബിജെപി കേരളത്തിൽ ചുവടുറപ്പിക്കാൻ ശ്രമിക്കുകയാണെന്ന് സിപിഎം വ്യക്തമാക്കി. എന്നാൽ കഴിഞ്ഞ തെരഞ്ഞെടുപ്പിൽ ബിജെപിയ്ക്ക് കേരളത്തിലെ ഒരേയൊരു സീറ്റ് നഷ്ടപ്പെടുകയും വോട്ടുവിഹിതം കുറയുകയും ചെയ്തിട്ടുണ്ട്. എന്നാൽ ബിജെപി ദുര്‍ബലമായി എന്നു കരുതരുതെന്നും ജാഗ്രത വേണമെന്നും സിപിഎം നിര്‍ദേശിച്ചു. വര്‍ഗീയ ധ്രുവീകരണം ഉപയോഗിച്ച് ബിജെപി ശക്തിപ്പെടുകയാണ്. ഹിന്ദുമതത്തിലെ ചില സാമൂഹികശക്തികള്‍ ബിജെപിയിലേയ്ക്ക് കൂറുമാറുന്നുണ്ട്. എന്നാൽ സാമ്പത്തികമായി പിന്നോക്കം നിൽക്കുന്നവര്‍ ബിജെപിയിൽ നിന്ന് അകലുന്നുണ്ടെന്നും ഇവര്‍ യുഡിഎഫിലേയ്ക്ക് പോകാതെ സിപിഎമ്മിലേയ്ക്ക് ചേര്‍ത്തു നിര്‍ത്താൻ കഴിയണമെന്നും സിപിഎം കീഴ്ഘടകങ്ങളോടു നിര്‍ദേശിച്ചു.