കലാഭവൻ മണിയില്ലാത്ത സിപിഐഎമ്മിന്‍റെ സ്ഥാനാ‍‍ർത്ഥിപട്ടിക

കൊച്ചി: കലാഭവൻ മണി മത്സരിക്കാനിരുന്ന കുന്നത്തുനാട് ഒഴിച്ചിട്ട് സിപിഐഎമ്മിന്‍റെ എറണാകുളം ജില്ലയിലെ കരട് സ്ഥാനാര്‍ത്ഥി പട്ടിക തയ്യാറായി. ജില്ലാ സെക്രട്ടറി പി. രാജീവ് തൃപ്പൂണിത്തുറയില്‍ മത്സരിച്ചേക്കും. എറണാകുളത്ത് എം. അനില്‍ കുമാറും ആലുവയില്‍ വി. സലീമും മത്സരിക്കും. മറ്റ് മണ്ഡലങ്ങളില്‍ ഒന്നിലധികം പേരെ പരിഗണിക്കുന്നുണ്ട്. കളമശേരിയില്‍ ചരന്ദന്‍പിള്ള, സക്കീര്‍ ഹുസൈന്‍, എ.എം യൂസഫ് എന്നിവരാണ് സാധ്യതാ പട്ടികയില്‍ ഉള്ളത്.

കൊച്ചിയില്‍ കെ.ജെ മാക്‌സി, ഡോ. ജെ. ജേക്കബ് എന്നിവരെയും പരിഗണിക്കുന്നു. വൈപ്പിനില്‍ എസ്. ശര്‍മയ്ക്ക് തന്നെയാണ് സാധ്യത കല്‍പ്പിക്കുന്നത്. തൃക്കാക്കരയില്‍ മുന്‍ എം.പി സെബാസ്റ്റിയന്‍ പോളിനെയും സി.എം ദിനേശ് മണിയെയും പരിഗണിക്കുന്നു. കെ.എന്‍ ഉണ്ണികൃഷ്ണനെയും ഇവിടെ പരിഗണിക്കുന്നുണ്ട്. പെരുമ്പാവൂരില്‍ സാജു പോളിന് മുന്നാമൂഴം നല്‍കാനാണ് സാധ്യത. രണ്ട് തവണ മത്സരിച്ചവര്‍ മാറണമെന്ന നിബന്ധന കര്‍ശനമാക്കിയാല്‍ ഇവിടെ എം.സി മോഹനനെ പരിഗണിക്കും.

കഴിഞ്ഞ ദിവസം അന്തരിച്ച നടന്‍ കലാഭവന്‍ മണിയെ മത്സരിപ്പിക്കാനിരുന്ന കുന്നത്തുനാട് സീറ്റില്‍ പുതിയ സ്ഥാനാര്‍ത്ഥിയെ നിശ്ചയിച്ചിട്ടില്ല. മൂന്ന് ദിവസത്തിനകം വീണ്ടും ചേരുന്ന ജില്ലാ സെക്രട്ടറിയേറ്റ് യോഗത്തില്‍ അന്തിമ പട്ടിക സംസ്ഥാന കമ്മറ്റിക്ക് കൈമാറും.