ബൽറാമിനെതിരെ സിപിഎമ്മിന്‍റെ അസഹിഷ്ണുത: സതീശൻ

കൊച്ചി: വി ടി ബൽറാം എൽഎൽഎയ്ക്കു നേര്‍ക്ക് സിപിഎം നടത്തുന്ന അക്രമങ്ങൾ അസഹിഷ്ണുത മൂലമാണെന്ന് കോണ്‍ഗ്രസ് നേതാവ് വി ഡി സതീശൻ. വി ടി ബൽറാമിനു നേര്‍ക്കു നടക്കുന്ന പ്രതിഷേധത്തെ പദ്മാവതി സിനിമയ്ക്കെതിരെ സംഘപരിവാര്‍ നടത്തുന്ന പ്രതിഷേധവുമായാണ് സതീശൻ താരതമ്യം ചെയ്തത്.

അധികാരത്തിലിരിക്കുന്ന സിപിഎം അണികളെക്കൊണ്ട് ചെയ്യിക്കുന്ന അക്രമങ്ങള്‍ ജനാധിപത്യശക്തികള്‍ ചെറുത്തുതോൽപിക്കുമെന്നും വിഡി സതീശൻ ഫേസ്ബുക്ക് പോസ്റ്റിൽ കുറിച്ചു.

വി ഡി സതീശന്‍റെ ഫേസ്ബുക്ക് പോസ്റ്റ്

വി ടി ബലറാമുമായി ബന്ധപ്പെട്ട വിഷയത്തില്‍ കെപിസിസി യും മുതിര്‍ന്ന നേതാക്കളും അഭിപ്രായം പറഞ്ഞു കഴിഞ്ഞു. ഞാനത് ആവര്‍ത്തിക്കുന്നില്ല. പക്ഷെ ബലറാമിനെതിരെ സി പി എം ഉയര്‍ത്തുന്നത് കൃത്യമായ അസഹിഷ്ണുതയാണു. പദ്മാവതി എന്ന ചലച്ചിത്രത്തിനെതിരെ ഉയര്‍ന്നതും രാജ്യവ്യാപകമായി സംഘപരിവാര്‍ നടത്തുന്നതും ഈ അസഹിഷ്ണുതയാണു. സംസ്ഥാനത്ത് അധികാരത്തിലിരിക്കുന്ന സിപി എം അണികളെ കൊണ്ട് നടത്തുന്ന ഈ അക്രമം ജനാധിപത്യ ശക്തികള്‍ ചെറുത്തു തോല്‍പ്പിക്കുക തന്നെ ചെയ്യും.