ശബരിമല ഹര്‍ത്താൽ കേരളത്തെപ്പറ്റി അവമതിപ്പുണ്ടാക്കാനെന്ന് സിപിഎം

തിരുവനന്തപുരം: കെ പി ശശികലയുടെ അറസ്റ്റിൽ പ്രതിഷേധിച്ച് സംസ്ഥാനത്ത് ആഹ്വാനം ചെയ്ത ഹര്‍ത്താൽ കേരളത്തെപ്പറ്റി അവമതിപ്പുണ്ടാക്കാനുള്ള സംഘപരിവാര്‍ അജണ്ടയുടെ ഭാഗമാണെന്ന് സിപിഎം. വിശ്വാസസംരക്ഷകര്‍ എന്ന് അവകാശപ്പെടുന്നവര്‍ നടപ്പാക്കിക്കൊണ്ടിരിക്കുന്നത് ശബരിമലയെ തകര്‍ക്കാനുള്ള പ്രവര്‍ത്തനങ്ങളാണെന്നും സിപിഎം സംസ്ഥാന സെക്രട്ടറിയേറ്റ് പുറത്തിറക്കിയ പ്രസ്താവനയിൽ പറയുന്നു.

സംസ്ഥാനത്തിനെതിരെ ലോകവ്യാപകമായി മോശം പ്രചരണം നടത്തിയവരാണ് ഇപ്പോള്‍ ശബരിമലയെ തകര്‍ത്ത് തീര്‍ത്ഥാടകര്‍ക്ക് രക്ഷയില്ലെന്ന പ്രചരണവുമായി രംഗത്തുവരുന്നതെന്നും ശബരിമലയിൽ കുഴപ്പങ്ങളുണ്ടെന്ന പ്രതീതി സ‍ൃഷ്ടിച്ച് തീര്‍ത്ഥാടകരെ അകറ്റിനിര്‍ത്താനുള്ള ശ്രമമാണ് നടത്തുന്നതെന്നും പ്രസ്താവനയിൽ പറയുന്നു. ശബരിമലയെ സാമ്പത്തികമായി തകര്‍ക്കാനാണ് കാണിക്കയിടരുതെന്ന പ്രചരണം നടത്തുന്നത്. തുലാമാസം നട തുറന്നപ്പോള്‍ ഹര്‍ത്താൽ നടത്തി ഭക്തജനങ്ങളെ ദുരിതത്തിലാഴ്ത്തിയവരാണ് വൃശ്ചികം ഒന്നിന് നട തുറന്നപ്പോള്‍ ഹര്‍ത്താലുമായി രംഗത്തിറങ്ങിയിരിക്കുന്നതെന്നും പ്രസ്താവനയിൽ ആരോപിക്കുന്നു.

സാധാരണ ഹര്‍ത്താൽ പ്രഖ്യാപിക്കുമ്പോള്‍ ശബരിമല തീര്‍ത്ഥാടകരെയും പത്തനംതിട്ട ജില്ലയെയും ഒഴിവാക്കാറുണ്ടെന്നും എൻ്നാൽ വിശ്വാസികളോട് കാണിക്കേണ്ട സാമാന്യമര്യാദ പോലും ഈ ഹര്‍ത്താലിൽ ഉണ്ടായില്ലെന്നും സിപിഎം പ്രസ്താവനയിൽ പറയുന്നു. അവസരം മുതലാക്കുക എന്ന ശ്രീധരൻ പിള്ളയുടെ പ്രസ്താവനയെയും ഇതുമായി കൂട്ടിവായിക്കണമെന്നും പ്രസ്താവനയിൽ ചൂണ്ടിക്കാട്ടി.