ഷുഹൈബ് വധം: പ്രതികളെ പുറത്താക്കുമെന്ന് സിപിഎം

തൃശ്ശൂര്‍: കണ്ണൂര്‍ മട്ടന്നൂരിലെ കോൺഗ്രസ് പ്രവര്‍ത്തകൻ ഷുഹൈബിന്‍റെ കൊലപാതകവുമായി ബന്ധമുള്ള പ്രവര്‍ത്തകരെ സിപിഎം പുറത്താക്കും. പാര്‍ട്ടി സംസ്ഥാനസമ്മേളനത്തിനു ശേഷമായിരിക്കും നടപടി. ഇതുസംബന്ധിച്ച് പാര്‍ട്ടി സംസ്ഥാനനേതൃത്വം നിര്‍ദേശം നല്‍കി.

ഫെബ്രുവരി 12ന് രാത്രിയിലായിരുന്നു എടയന്നൂരിൽ വച്ച് ഷുഹൈബ് കൊല്ലപ്പെട്ടത്. സംഭവവുമായി ബന്ധപ്പെട്ട് ആകാശ്, റിജിൻ രാജ് എന്നിവരെ പോലീസ് അറസ്റ്റ് ചെയ്തിരുന്നു. പ്രാദേശികനേതൃത്വത്തിന്‍റെ അറിവോടെയായിരുന്നു കൊലപാതകമെന്ന് പോലീസിന് വിവരം ലഭിച്ചിരുന്നു.

ഇന്നലെ നടന്ന സമാധാനയോഗം സിപിഎം - കോൺഗ്രസ് നേതാക്കള്‍ തമ്മിലുള്ള തര്‍ക്കത്തെ തുടര്‍ന്ന് കോൺഗ്രസ് ബഹിഷ്കരിച്ചിരുന്നു.