'മുഖ്യമന്ത്രിയെ ലക്ഷ്യമിടുന്നു'; കേന്ദ്ര ഏജൻസികൾക്കെതിരെ പ്രക്ഷോഭം നടത്താൻ സിപിഎം

തിരുവനന്തപുരം: കേന്ദ്ര അന്വേഷണ ഏജൻസികള്‍ക്കെതിരെ സിപിഎം പ്രക്ഷോഭത്തിന് ഒരുങ്ങുന്നതായി റിപ്പോര്‍ട്ട്. കേന്ദ്ര ഏജൻസികള്‍ ലക്ഷ്യം വെക്കുന്നത് മുഖ്യമന്ത്രി പിണറായി വിജയനെയാണെന്ന് സിപിഎം സംസ്ഥാന കമ്മിറ്റി വിലയിരുത്തിയെന്നാണ് വാര്‍ത്താ ചാനലായ ഏഷ്യാനെറ്റ് ന്യൂസിൻ്റെ റിപ്പോര്‍ട്ട്. അന്വേഷണഏജൻസികളുടെ നീക്കം രാഷ്ട്രീയ പ്രേരിതമാണെന്നും ഇതു തുറന്നു കാണിക്കണമെന്നും സെക്രട്ടറിയേറ്റ് യോഗത്തിൽ തീരുമാനിച്ചതായും റിപ്പോര്‍ട്ടിൽ പറയുന്നു.

സംസ്ഥാന സര്‍ക്കാരിൻ്റെ വൻകിട പദ്ധതികള്‍ക്കെതിരെ എൻഫോഴ്സ്മെൻ്റ് ഡയറക്ടറേറ്റ് അടക്കമുള്ള കേന്ദ്ര ഏജൻസികള്‍ അന്വേഷണം നടത്തുന്നതിനിടെയാണ് സിപിഎമ്മിൻ്റെ നീക്കം. ഈ മാസം പതിനാറിന് സംസ്ഥാന വ്യാപകമായി കേന്ദ്ര ഏജൻസികള്‍ക്കെതിരെ സമരം നടത്താനാണ് സിപിഎമ്മിൻ്റെ പദ്ധതി.

Also Read: ട്രാൻസ്ജെൻഡറുകള്‍ക്കും ഇനി ഖുറാൻ പഠനം; രാജ്യത്തെ ആദ്യ പ്രത്യേക മദ്രസ തുറന്ന് ബംഗ്ലാദേശ്

മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സിഎം രവീന്ദ്രനെ ഇഡി ചോദ്യം ചെയ്യാനായി വിളിപ്പിച്ച തീരുമാനം രാഷ്ട്രീയ പ്രേരികമാണെന്ന് സിപിഎം വിലയിരുത്തിയതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു. മുഖ്യമന്ത്രിയുടെ പ്രിൻസിപ്പൽ സെക്രട്ടറി എം ശിവശങ്കറിനെ അറസ്റ്റ് ചെയ്തതിനു പിന്നാലെയാണ് അഡീഷണൽ പ്രൈവറ്റ് സെക്രട്ടറിയ്ക്കെതിരായ ഇഡിയുടെ നീക്കം. എന്നാൽ ഇതിൻ്റെ ലക്ഷ്യം മുഖ്യമന്ത്രിയാണെന്നാണ് സിപിഎമ്മിൻ്റെ വിലയിരുത്തൽ.

Also Read: ഇഡിയെ ഒരു ചുക്കും ചെയ്യാൻ കഴിയില്ല: ബിനീഷിന്‍റെ വീടിന് മുന്നില്‍ കാർ തടഞ്ഞ് ഹീറോയിസം കാണിച്ച പോലീസുകാർ പെട്ടു

അതേസമയം, തദ്ദേശ തെരഞ്ഞെടുപ്പിന് ആഴ്ചകള്‍ മാത്രം ബാക്കി നിൽക്കേ യുഡിഎഫ് നിലപാട് സംസ്ഥാന സര്‍ക്കാരിനെതിരാണ്. കേന്ദ്ര ഏജൻസികള്‍ അന്വേഷണം നടത്തുന്നത് നിയമവിധേയമായാണെന്നായിരുന്നു പ്രതിപക്ഷ നേതാവ് രമേശ് ചെന്നിത്തലയുടെ പ്രതികരണം. സംസ്ഥാന സര്‍ക്കാര്‍ പദ്ധതികള്‍ അട്ടിമറിക്കാനാണ് കേന്ദ്ര ഏജൻസികള്‍ ശ്രമിക്കുന്നതെന്ന ആരോപണവും ചെന്നിത്തല തള്ളിക്കളഞ്ഞു.