കൃഷ്ണൻ കായലിൽ ചാടിയ സംഭവം പാര്‍ട്ടി അന്വേഷിക്കുമെന്ന്

കൊച്ചി: എളങ്കുന്നപ്പുഴ മുൻ പഞ്ചായത്ത് പ്രസിഡന്‍റ് വി കെ കൃഷ്ണൻ കായലിൽ ചാടി ആത്മഹത്യ ചെയ്ത സംഭവത്തെക്കുറിച്ച് പാര്‍ട്ടി അന്വേഷിക്കുമെന്ന് സ്ഥലം എംഎൽഎ എസ് ശര്‍മ. ഏറെ ജനപിന്തുണയുള്ള കൃഷ്ണൻ പാര്‍ട്ടിയ്ക്കെതിരെ കുറിപ്പ് എഴുതിയ ശേഷം ആത്മഹത്യ ചെയ്ത പശ്ചാത്തലത്തിലാണ് അന്വേഷണം.

കൃഷ്ണൻ ആത്മഹത്യ ചെയ്യുന്നതിന് രണ്ട് ദിവസം മുൻപും തന്നെ കണ്ടിരുന്നുവെന്നും ഏതെങ്കിലും തരത്തിലുള്ള മാനസികവിഷമം അദ്ദേഹത്തിനുണ്ടായിരുന്നുവെന്ന് തന്നോട് പറഞ്ഞിരുന്നില്ലെന്നും എസ് ശര്‍മ പറഞ്ഞതായി മാതൃഭൂമി ന്യൂസ് റിപ്പോര്‍ട്ട് ചെയ്തു.

ചൊവ്വാഴ്ച രാത്രി ഏഴരയോടെയാണ് വൈപ്പിനിൽ നിന്ന് ഫോര്‍ട്ട് കൊച്ചിയ്ക്കുള്ള ഫെറി ബോട്ടിൽ നിന്ന് കൃഷ്ണൻ കായലിൽ ചാടിയത്.

തന്നെ പുകച്ച് പുറത്താക്കുന്ന ഒരു പാര്‍ട്ടിയാണ് എളങ്കുന്നപ്പുഴ ലോക്കൽ കമ്മിറ്റിയെന്ന് ആത്മഹത്യാക്കുറിപ്പിൽ ആരോപിച്ചിരുന്നു. താൻ തെറ്റുകളുടെ കൂമ്പാരമാണെന്നും കൃഷ്ണൻ ചൂണ്ടിക്കാട്ടിയിരുന്നു. കത്ത് മറ്റൊരു യാത്രക്കാരനെ ഏൽപിച്ച ശേഷമാണ് കൃഷ്ണൻ കായലിൽ ചാടിയത്.