അഭിമന്യുവിൻെറ കുടുംബത്തെ സിപിഎം ഏറ്റെടുക്കും

കൊച്ചി: എറണാകുളം മഹാരാജാസ് കോളേജിൽ ദാരുണമായി കൊല ചെയ്യപ്പെട്ട എസ്എഫ്എെ നേതാവ് അഭിമന്യുവിൻെറ കുടുബത്തിൻെറ സംരക്ഷണം സിപിഎം ഏറ്റെടുക്കും. ഒറ്റമുറി വീട്ടില്‍ കഴിയുന്ന കുടുംബത്തിന് വാസയോഗ്യമായ വീട് നിര്‍മ്മിച്ചു നല്‍കും.

ഇടുക്കി വട്ടവട സ്വദേശിയായ അഭിമന്യുവിൻെറ മാതാപിതാക്കളുടെ സംരക്ഷണം പാ‍ർട്ടി നോക്കും. സഹോദരിയുടെ വിവാഹ ചെലവും വഹിക്കുമെന്ന് സിപിഎം എറണാകുളം ജില്ലാക്കമ്മിറ്റി പത്രക്കുറിപ്പിൽ അറിയിച്ചു.

ആശുപത്രിയില്‍ ചികിത്സയില്‍ കഴിയുന്ന അര്‍ജ്ജുന്‍റെയും വീനിതിന്‍റെയും മുഴുവന്‍ ചികിത്സ ചിലവുകളും പാര്‍ട്ടി വഹിക്കും. ഇതിന് ആവശ്യമായ തുക ജൂലൈ 15,16 തീയതികളില്‍ ജില്ലയിലെ പ്രവർത്തകർ രംഗത്തിറങ്ങി വീട് വീടാന്തരം കയറി ഹുണ്ടിക കളക്ഷനിലുടെ സമാഹരിക്കുവാനും തീരുമാനിച്ചു.

എസ്.ഡി.പി.ഐ - എന്‍.ഡി.എഫ്-ക്യാമ്പസ് ഫ്രണ്ട് പ്രസ്ഥാനങ്ങൾ മതനിരപേക്ഷത തകര്‍ക്കാൻ ശ്രമിക്കുകയാണ്. പൊതുജനങ്ങളെ അണിനിരത്തി ഇതിനെ ചെറുക്കുമെന്നും സിപിഎം വ്യക്തമാക്കി.