കുറ്റ്യാടിയിൽ സിപിഎംകാരൻ്റെ വീടിനു നേർക്ക് ബോംബേറ്

കോഴിക്കോട്: കുറ്റ്യാടിയ്ക്ക് സമീപം നെട്ടൂരിൽ സിപിഎം പ്രവര്‍ത്തകന്‍റെ വീടിനു നേര്‍ക്ക് ബോംബെറിഞ്ഞു. വില്ലങ്ങോട് ബ്രാഞ്ച് സെക്രട്ടറിയായ ഗിരീഷിന്‍റെ വീടിനു നേര്‍ക്കാണ് ആക്രമണമുണ്ടായത്. ആക്രമണത്തിന് പിന്നിൽ ആര്‍എസ്എസ് ആണെന്നാണ് സിപിഎമ്മിന്‍റെ ആരോപണം.

ചൊവ്വാഴ്ച അര്‍ധരാത്രിയോടെയായിരുന്നു ആക്രമണമുണ്ടായത്. വീടിന്‍റെ മുൻഭാഗത്തിന് കാര്യമായ കേടുപാടുകള്‍ സംഭവിക്കുകയും ജനൽച്ചില്ലുകള്‍ തകര്‍ന്നുവീഴുകയും ചെയ്തു. ഉഗ്രശബ്ദത്തോടെയുള്ള സ്ഫോടനമാണുണ്ടായതെന്നാണ് റിപ്പോര്‍ട്ടുകള്‍.

ഇതിനിടെ പേരാമ്പയിൽ ഒരു ഡിവൈഎഫ്ഐ പ്രവര്‍ത്തന് വെട്ടേറ്റു. ശബരിമല വിഷയത്തിൽ നടത്തിയ ഹര്‍ത്താലിനിടെ സിപിഎം ജില്ലാ സെക്രട്ടറി പി മോഹനനന്‍റെ മകനെയും ഭാര്യയായ ഏഷ്യാനെറ്റ് ന്യൂസ് റിപ്പോര്‍ട്ടറെയും ആക്രമിച്ച സംഭവത്തിന്‍റെ തുടര്‍ച്ചാണ് ഇതെന്നാണ് വിലയിരുത്തൽ.