കേരള കോണ്‍ഗ്രസിനെ കൂട്ടുന്നതിൽ സിപിഎം കേന്ദ്രനേതൃത്വത്തിന് എതിര്‍പ്പ്

തിരുവനന്തപുരം: കേരള കോണ്‍ഗ്രസ് എമ്മിനെ എൽഡിഎഫിലെടുക്കാനുള്ള നീക്കത്തിന് സിപിഎം കേന്ദ്രനേതൃത്വത്തിന്‍റെ എതിര്‍പ്പെന്ന് സൂചന. എന്നാൽ ശരദ് യാവും എച്ച് ഡി ദേവെഗൗഡയും തമ്മിലുള്ള ചര്‍ച്ചയുടെ അടിസ്ഥാനത്തിൽ ജെഡി - യു വീരേന്ദ്രകുമാര്‍ ഘടകത്തെ മുന്നണിയിൽ സ്വീകരിക്കാൻ ധാരണയായതായി പാര്‍ട്ടി വൃത്തങ്ങള്‍ സൂചിപ്പിച്ചു.

മാണിയെ മുന്നണിയിലെടുക്കണമെങ്കില്‍ സിപിഐ കൂടി വിശ്വാസത്തിലെടുത്തശേഷം മതിയെന്നായിരുന്നു സെക്രട്ടറിയേറ്റിൽ വ്യക്തമാക്കപ്പെട്ടത്. മാത്രമല്ല മാണിയ്ക്കൊപ്പം പിജെ ജോസഫും പറ്റുമെങ്കിൽ ഫ്രാൻസിസ് ജോര്‍ജിന്‍റെ ജനാധിപത്യ കോണ്‍ഗ്രസും ഒപ്പമുണ്ടാകണമെന്നാണ് സിപിഎം താത്പര്യം. എന്നാൽ നിലവിലെ സാഹചര്യത്തിൽ ജോസഫ് പോലും ഒപ്പമുണ്ടാകാനിടയില്ല. കൂടാതെ മാണിക്കെതിരെ ശക്തമായ നിലപാടെടുത്ത ശേഷം മുന്നണിയിൽ എടുക്കുന്നത് എങ്ങനെ ന്യായീകരിക്കാനാവുമെന്ന ചോദ്യവും ബാക്കിയാണ്.