ശബരിമലയില്‍ വിട്ടുവീഴ്ച വേണ്ടെന്ന് സിപിഎം തീരുമാനം

തിരുവനന്തപുരം: ശബരിമല സ്ത്രീ പ്രവേശനവുമായി ബന്ധപ്പെട്ട വിഷയത്തില്‍ വിട്ടുവീഴ്ച വേണ്ടെന്ന നിലപാടിലുറച്ച് സിപിഎം. തിരുവനന്തപുരത്ത് ചേര്‍ന്ന സിപിഎം സംസ്ഥാന സെക്രട്ടേറിയറ്റ് യോഗമാണ് പാര്‍ട്ടി നിലപാടില്‍ വിട്ടുവീഴ്ച വേണ്ടെന്ന തീരുമാനമെടുത്തത്. സ്ത്രീപ്രവേശന വിഷയത്തില്‍ സംഘപരിവാര്‍ സംഘടനകളും ബിജെപിയും കോണ്‍ഗ്രസും നടത്തുന്ന പ്രചാരണങ്ങളെ രാഷ്ട്രീയമായി നേരിടാനാണ് സിപിഎമ്മിന്‍റെ തീരുമാനം.

ശബരിമല വിഷയത്തില്‍ നിലപാട് മുറുകെപ്പിടിച്ച് മുന്നോട്ടുപോകാന്‍ തന്നെയാണ് സിപിഎം സെക്രട്ടേറിയറ്റ് തീരുമാനിച്ചിരിക്കുന്നത്. ഇതിനായി സംസ്ഥാന വ്യാപകമായി വിശദീകരണയോഗങ്ങളും പ്രചാരണ പരിപാടികളും സംഘടിപ്പിക്കാനാണ് സിപിഎം ലക്ഷ്യമിടുന്നത്. ഇതോടൊപ്പം കാല്‍നട ജാഥകളും പ്രചാരണ യോഗങ്ങളും സംഘടിപ്പിക്കും. കാല്‍നട ജാഥകള്‍ക്ക് മന്ത്രിമാരും എംഎല്‍എമാരും സെക്രട്ടേറിയറ്റ് അംഗങ്ങളും നേതൃത്വം നല്‍കും. ഇപ്പോഴത്തെ പ്രതിഷേധങ്ങള്‍ തിരിച്ചടിയാകില്ലെന്നാണ് സംസ്ഥാന സെക്രട്ടേറിയറ്റിന്‍റെ വിലയിരുത്തല്‍.