'ഐതിഹാസിക മുന്നേറ്റം; 'പ്രതിപക്ഷത്തിന്റെ കള്ള പ്രചാരണങ്ങളെല്ലാം ജനം തള്ളി കളഞ്ഞു: കോടിയേരി ബാലകൃഷ്ണന്‍

കണ്ണൂര്‍: തദ്ദേശ സ്വയം ഭരണ തെരഞ്ഞെടുപ്പില്‍ ഇടതുമുന്നണിയുടേത് ഐതിഹാസിക മുന്നേറ്റമെന്ന് കോടിയേരി ബാലകൃഷ്ണന്‍. പ്രതിപക്ഷത്തിന്റെ കള്ള പ്രചാരണങ്ങളെല്ലാം ജനം തള്ളി കളഞ്ഞു. ഇടതുമുന്നണി സര്‍ക്കാര്‍ മുന്നോട്ടുവെച്ച വികസന ജനക്ഷേമ പ്രവര്‍ത്തനങ്ങള്‍ക്കുള്ള അംഗീകാരമാണ് തെരഞ്ഞെടുപ്പ് ഫലമെന്ന് കോടിയേരി പ്രതികരിച്ചു.

Also Read: തദ്ദേശ തെരഞ്ഞെടുപ്പ് 2020: പ്രതീക്ഷയോടെ മുന്നണികള്‍, വോട്ടെണ്ണൽ ആരംഭിച്ചു

സംസ്ഥാനത്ത് ഇടതുമുന്നണി വന്‍ മുന്നേറ്റമാണ് കാഴ്ചവെയ്ക്കുന്നത്. നിലവില്‍ ഗ്രാമ പഞ്ചായത്ത്, ബ്ലോക്ക് പഞ്ചായത്ത്. ജില്ലാ പഞ്ചായത്ത് എന്നിവിടങ്ങളില്‍ എല്‍ഡിഎഫിന് മികച്ച നേട്ടമാണ് കൈവരിക്കുന്നത്. കോര്‍പ്പറേഷനില്‍ എല്‍ഡിഎഫും യുഡിഎഫും ഇഞ്ചോടിഞ്ച് മത്സരമാണ്. എന്നാല്‍, മുനിസിപ്പാലിറ്റിയില്‍ യുഡിഎഫാണ് മുന്നില്‍. തൊട്ടുപിന്നാലെ എല്‍ഡിഎഫുണ്ട്. വരും മണിക്കൂറുകളില്‍ ഫലം മാറിമറിഞ്ഞേക്കാം.

ഗ്രാമപഞ്ചായത്തുകളില്‍ 442 ഇടത്ത് എല്‍ഡിഎഫും 376 ഇടത്ത് യുഡിഎഫും 3 ഇടത്ത് എന്‍ഡിഎയും മുന്നിട്ട് നില്‍ക്കുന്നു. ഇടതു മുന്നണി ചരിത്രത്തില്‍ ആദ്യമായി പാലാ നഗരസഭ പിടിച്ചെടുത്തു. ജോസിന്റെ രണ്ടില ചൂടിയാണ് ഇടത് പാല നഗരസഭ പിടിച്ചെടുത്തത്.

Also Read: സിറ്റിങ് സീറ്റ് കൈവിട്ടു; പെരിയ ഇരട്ടക്കൊല നടന്ന കല്യോട്ട് യുഡിഎഫിന്, സിപിഎമ്മിന് വന്‍ തിരിച്ചടി

2015 തദ്ദേശ തെരഞ്ഞെടുപ്പില്‍ ആകെയുള്ള 941 ഗ്രാമപഞ്ചായത്തുകളില്‍ 577 ഇടത് എല്‍ഡിഎഫും 347 ഇടത് യുഡിഎഫുമാണ് വിജയിച്ചത്.