മദ്യനിരോധനമില്ലാതെ ഇടതുമുന്നണി കരട് പ്രകടനപത്രിക

തിരുവനന്തപുരം: മദ്യനിരോധനമല്ല ഉപഭോഗം കുറയ്ക്കുകയാണ് ലക്ഷ്യമെന്ന് ഇടതു മുന്നണി കരട് പ്രകടന പത്രിക. എന്‍ഡോസള്‍ഫാന്‍ ദുരുതിബാധിതര്‍ക്ക് കൂടുതല്‍ സഹായം നല്‍കുമെന്നും പത്രിക പറയുന്നു. എന്നാല്‍ ഡോ. ടി.എം. തോമസ് ഐസക്ക് കണ്‍വീനറായി തയാറാക്കിയ തെരഞ്ഞെടുപ്പു പ്രകടന പത്രിക യുഡിഎഫിന്റെ പ്രകടന പത്രിക പുറത്തിറങ്ങിയതിനു ശേഷം പ്രസിദ്ധീകരിച്ചാല്‍ മതിയെന്ന് ഇടതുമുന്നണി യോഗത്തില്‍ ധാരണയായി. 21-നു പ്രകടന പത്രിക പ്രസിദ്ധീകരിക്കും.

സിപിഎം തിരുവനന്തപുരത്തു സംഘടിപ്പിച്ച അന്താരാഷ്ട്ര പഠന കോണ്‍ഗ്രസില്‍ പാര്‍ട്ടി പോളിറ്റ്ബ്യൂറോ അംഗം പിണറായി വിജയന്‍ അവതരിപ്പിച്ച വികസന കാഴ്ചപ്പാടുകളിലെ ഏറിയ അംശവും പ്രകടന പത്രികയില്‍ ഉള്‍ക്കൊള്ളിച്ചിട്ടുണ്ട്. വികസനത്തിനാവശ്യമായ ഭൗതിക സാഹചര്യം ഒരുക്കുന്നതിനു ഭൂമി ഏറ്റെടുക്കുന്നതിനു പ്രത്യേക പദ്ധതിയടക്കം പ്രഖ്യാപിച്ചുകൊണ്ടുള്ള പ്രകടന പത്രികയ്ക്കാണ് ഇടതുമുന്നണി രൂപം കൊടുത്തിട്ടുള്ളത്.

ജൈവ പച്ചക്കറി കൃഷി പ്രോത്സാഹിപ്പിക്കുന്നതോടൊപ്പം ഈ മേഖലയില്‍ ഹൈടെക്ക് കൃഷിരീതിതന്നെയാണു പച്ചക്കറി ദൗര്‍ലഭ്യം പരിഹരിക്കാന്‍ ഏക പരിഹാരമാര്‍ഗമെന്നും പ്രകടന പത്രികയില്‍ വ്യക്തമാക്കുന്നു.