സിപിഎം സംസ്ഥാന സമിതി ഇന്ന്: ആന്തൂരും ബിനോയിയും ചർച്ചാവിഷയമാകും

തിരുവനന്തപുരം: ഇന്നലെ ആരംഭിച്ച നേതൃയോഗത്തിന് ശേഷം സിപിഎം സംസ്ഥാന സമിതി ഇന്ന് തുടങ്ങും. ബിനോയ് കോടിയേരി വിഷയവും അന്തൂരിലെ വ്യവസായിയുടെ മരണവും സിപിഎമ്മിനെ പ്രതിരോധിലാക്കിയിരിക്കുന്ന സന്ദർഭത്തിലാണ് സംസ്ഥാനസമിതി യോഗം നടക്കുന്നത്.

ബിനോയ് കൊടിയേരിക്കെതിരെ ബിഹാർ സ്വദേശിനിയായ ബാർ ഡാൻസർ നൽകിയ പീഡന പരാതി കോടിയേരി ബാലകൃഷ്ണൻ തന്നെ യോഗത്തിൽ റിപ്പോർട്ട് ചെയ്യും. വ്യവസായി സാജന്റെ മരണത്തിൽ ആന്തൂർ നഗരസഭാ അധ്യക്ഷ പി.കെ ശ്യാമള രാജിവെക്കേണ്ട ആവശ്യമില്ലെന്ന് കോടിയേരി ഇന്നലെ വ്യക്തമാക്കിയിരുന്നു. നഗരസഭാ ഉദ്യോഗസ്ഥരാണ് പ്രശ്നം വഷളാക്കിയതെന്നും കോടിയേരി പറഞ്ഞിരുന്നു.

ബിനോയ് കോടിയേരിയെ താനോ പാർട്ടിയോ സംരക്ഷിക്കില്ലെന്നും കോടിയേരി വാർത്താസമ്മേളനത്തിൽ വ്യക്തമാക്കിയിരുന്നു. പി.കെ ശ്യാമളക്കെതിരെ സംസ്ഥാന സമിതിയിൽ വിമർശനമുയർന്നേക്കുമെന്നാണ് സൂചന. ഇന്നലെ ധർമശാലയിൽ നടന്ന രാഷ്ട്രീയ വിശദീകരണ യോഗത്തിൽ ശ്യാമളക്ക് വീഴ്ച സംഭവിച്ചെന്ന് പി.ജയരാജൻ വിലയിരുത്തിയിരുന്നു. ഉദ്യോഗസ്ഥരുടെ നടപടിയിൽ ജനപ്രതിനിധികൾ ഇടപെടണമായിരുന്നു എന്ന് പി ജയരാജൻ വേദിയിൽ തുറന്നു പറഞ്ഞു.