വിധി നടപ്പാക്കാതെ വേറെ വഴിയില്ല: കൊടിയേരി

തിരുവനന്തപുരം: ശബരിമലയില്‍ സ്ത്രീപ്രവേശനം അനുവദിച്ചുകൊണ്ടുള്ള സുപ്രീംകോടതി വിധി നടപ്പാക്കാതെ സര്‍ക്കാരിന് വേറെ വഴിയില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കി. ശ്രീരാമന് പകരം കേരളത്തില്‍ അയ്യപ്പനെ ഉപയോഗിക്കുകയാണ് ബിജെപി. വിധിക്ക് സ്റ്റേയില്ലെന്ന് വീണ്ടും സുപ്രീംകോടതി വ്യക്തമാക്കിയ സാഹചര്യത്തില്‍ വിധി നടപ്പാക്കാതെ സര്‍ക്കാരിന് മുന്നില്‍ വേറെ വഴിയില്ല. ബിജെപിക്കെതിരായ വികാരം രാജ്യത്താകമാനം ശക്തമാണെന്നും അദ്ദേഹം പറഞ്ഞു.

ശബരിമല പ്രശ്‌നത്തില്‍ സര്‍ക്കാര്‍ വിളിച്ചിരിക്കുന്ന സര്‍വ്വകക്ഷിയോഗവും തന്ത്രിയും പന്തളം രാജകുടുംബങ്ങളുമായുള്ള ചര്‍ച്ചയും നാളെ നടക്കുകയാണ്. മണ്ഡല മകരവിളക്ക് കാലത്ത് ശബരിമലയില്‍ അരലക്ഷത്തിലേറെ പൊലീസ് ഉദ്യോഗസ്ഥരെ വിന്യസിക്കാനാണ് തീരുമാനിച്ചിരിക്കുന്നത്.

എന്നാൽ പുന:പരിശോധനാ ഹര്‍ജികള്‍ തുറന്നകോടതിയിൽ കേള്‍ക്കാന്‍ സുപ്രീം കോടതി തീരുമാനിച്ചിരിക്കുന്ന സാഹചര്യത്തില്‍ പ്രതിഷേധം ഇപ്പോഴുള്ളതിലും വര്‍ദ്ധിക്കുമെന്നും സര്‍ക്കാര്‍ കണക്കു‍കൂട്ടുന്നുണ്ട്. വെള്ളിയാഴ്ച മുതല്‍ രണ്ട് മാസത്തോളം നീളുന്ന തീര്‍ത്ഥാടന കാലമായ മണ്ഡലകാലം സര്‍ക്കാറിനുമുന്നിൽ ഏറെ വെല്ലുവിളികള്‍ നിറഞ്ഞതായിരിക്കുകയാണ്.