ഹെലികോപ്റ്റര്‍ യാത്രയുടെ പണം സിപിഎം നല്‍കുമെന്ന് കടകംപള്ളി

തിരുവനന്തപുരം: മുഖ്യമന്ത്രി പിണറായി വിജയന്‍റെ ഹെലികോപ്റ്റര്‍ യാത്രയെ കുറിച്ചുണ്ടായ വിവാദത്തിന് മറുപടിയുമായി കടകംപള്ളി സുരേന്ദ്രൻ. യാത്രക്ക് ചെലവായ എട്ടുലക്ഷം രൂപ നല്‍കാനുള്ള ശേഷി സിപിഎമ്മിനുണ്ടെന്ന് സഹകരണമന്ത്രി കടകംപള്ളി സുരേന്ദ്രന്‍ പ്രതികരിച്ചു.

ഓഖി ദുരന്തത്തിന് അനുവദിച്ച തുക ഉപയോഗിച്ചാണ് മുഖ്യമന്ത്രി ഹെലികോപ്റ്റര്‍ യാത്ര നടത്തിയതെന്ന വാദമാണ് വിവാദമായത്. ദുരിതാശ്വാസനിധിയില്‍ നിന്ന് പണം അനുവദിച്ചതില്‍ റവന്യൂമന്ത്രിയും റവന്യൂസെക്രട്ടറിയും ഏറ്റുമുട്ടിയിരുന്നു. സെക്രട്ടറിയോട് വിശദീകരണം ചോദിച്ചെന്ന് മന്ത്രിയും ഇതേപ്പറ്റി അറിയില്ലെന്ന് ക്ഷുഭിതനായി സെക്രട്ടറി പി.എച്ച് കുര്യനും പ്രതികരിച്ചിരുന്നു. ഇത് സംബന്ധിച്ച ഉത്തരവിറങ്ങിയത് അറിഞ്ഞില്ലെന്ന മുഖ്യമന്ത്രിയുടെയും റവന്യൂമന്ത്രിയുടെയും വാദം ഉത്തരവിന്‍റെ പകര്‍പ്പ് ഇറങ്ങിയതോടെ പൊളിഞ്ഞു. റവന്യൂ വകുപ്പ് അഡീഷണൽ ചീഫ് സെക്രട്ടറി പി.എച്ച് കുര്യൻ താനറിയാതെ ഉത്തരവിറക്കിയത് സര്‍ക്കാരിന് അവമതിപ്പുണ്ടാക്കിയെന്ന് റവന്യൂമന്ത്രി പ്രതികരിച്ചിരുന്നു.