Neyyattinkara Murder: ക്രൈം ബ്രാഞ്ച് അന്വേഷണത്തിന് ശുപാർശ

തിരുവനന്തപുരം: നെയ്യാറ്റിൻകരയിൽ യുവാവിനെ തർക്കത്തിനിടെ കൊലപ്പെടുത്തിയ ഡിവൈഎസ്‌പിക്കെതിരെ ക്രൈം ബ്രാഞ്ച് അന്വേഷണം നടത്തണമെന്ന് ശുപാർശ. പ്രതി ഉന്നത പോലീസ് ഉദ്യോഗസ്ഥനായതിനാൽ ക്രൈം ബ്രാഞ്ച് അന്വേഷണം വേണമെന്നാണ് നിഗമനം. ഇത് സംബന്ധിച്ച് റൂറൽ എസ്‌പി ഡിജിപിക്ക് ശുപാർശ സമർപ്പിച്ചു.

ഇന്നലെയാണ് നെയ്യാറ്റിൻകരയിൽ സനൽ കുമാർ എന്ന യുവാവിനെ വാഹനം പാർക്ക് ചെയ്തതിനെ തുടർന്നുള്ള തർക്കത്തിനിടയിൽ ഡിവൈഎസ്‌പി ഹരികുമാർ റോഡിലേക്ക് തള്ളിയത്. റോഡിലേക്ക് വീണ സനൽ കുമാർ കാറിടിച്ച് മരിച്ചു. ആശുപത്രിയിലേക്ക് കൊണ്ട് പോകുന്നതിന് പകരം പോലീസ് വാഹനത്തിൽ സനലിനെ നെയ്യാറ്റിൻകര പോലീസ് സ്റ്റേഷനിലേക്ക് കൊണ്ട് പോയെന്ന് നാട്ടുകാർ ആരോപിച്ചു.

സനാലുമായി തർക്കമുണ്ടായി ശേഷം ഒളിവിൽ പോയ ഡിവൈഎസ്‌പിയെ കണ്ടെത്താൻ ഇത് വരെ പൊലീസിന് സാധിച്ചിട്ടില്ല. ഹരികുമാറിന്റെ പാസ്‌പോർട്ട് പോലീസ് കണ്ടുകെട്ടുമെന്ന് സൂചനയുണ്ട്. ഹരികുമാർ വിദേശത്തേക്ക് കടക്കുന്നത് തടയാനാണ് പോലീസ് നീക്കം. ഹരികുമാറിനായി ഇന്ന് തന്നെ പോലീസ് ലുക് ഔട്ട് നോട്ടീസ് ഇറക്കിയേക്കും.