ബുറേവി കന്യാകുമാരിക്ക് 380 കിലോമീറ്റര്‍ അടുത്ത്; കേരളത്തിൽ അതി തീവ്രന്യൂനമര്‍ദ്ദമായി മാറിയേക്കും

തമിഴ്നാട്ടിൽ ഇന്ന് രാത്രിയോടെ തീരം തൊടും. നിലവിൽ ബുറേവി ചുഴലിക്കാറ്റ് കന്യാകുമാരിക്ക് 380 കിലോമീറ്റര്‍ അടുത്താണുള്ളത്. കന്യാകുമാരിക്കും രാമേശ്വരത്തിനും ഇടയിലൂടെയാണ് ചുഴലിക്കാറ്റ് കടക്കുക.

Also Read : പ്രളയം, പ്രകൃതി ദുരന്തങ്ങൾ ആവർത്തിച്ച പ്രദേശങ്ങളിൽ കരുതൽ വേണം

ഇന്നലെ ഇന്ത്യൻ സമയം രാത്രി 10 മണിയോടെയാണ് ശ്രീലങ്കൻ തീരത്ത് ചുഴലിക്കാറ്റ് എത്തുന്നത്. ഇത് വലിയ നാശനഷ്ടങ്ങളാണ് ഉണ്ടാക്കിയതായാണ് റിപ്പോര്‍ട്ടുകള്‍. മുല്ലൈത്തീവ്, കിള്ളിനോച്ചി മേഖലകളിൽ പേമാരിയും കാറ്റും ഉണ്ടായി

തെക്കൻ കേരളത്തിൽ ചുഴലിക്കാറ്റ് മുന്നറിയിപ്പ് ഉണ്ട്. കേരളത്തിൽ കാറ്റിന്റെ വേഗത കുറഞ്ഞ് തീവ്ര ന്യൂനമര്‍ദ്ദമായി മാറുമെന്നും റിപ്പോര്‍ട്ടുകളുണ്ട്. 90 കിലോമീറ്റര്‍ വേഗത്തിൽ കാറ്റ് വീശാനാണ് സാധ്യതയെന്നും റിപ്പോര്‍ട്ടിൽ പറയുന്നു.

കാറ്റ് കടന്നു പോകുവാൻ സാധ്യതയുള്ള തെക്കൻ ജില്ലകളായ തിരുവനന്തപുരം, കൊല്ലം, പത്തനംതിട്ട, ആലപ്പുഴ എന്നിവിടങ്ങളിൽ കേന്ദ്ര കാലാവസ്ഥാ വകുപ്പ് റെഡ് അലേര്‍ട്ട് പ്രഖ്യാപിച്ചിരിക്കുകയാണ്. കാലാവസ്ഥാ നിരീക്ഷകര്‍ നിര്‍ദ്ദേശിക്കുന്നതനുസരിച്ച് 24 മണിക്കൂറിൽ 204.5 മില്ലീമീറ്ററിൽ കൂടുതൽ മഴ ലഭിക്കാനുള്ള സാധ്യതയാണുള്ളത്. ഇത്തരത്തിൽ അതിതീവ്ര മഴ ലഭിക്കുന്നത് അപകട സാധ്യത വർധിപ്പിക്കുമെന്നും ഇന്നലെ പുറത്തുവിട്ട വാര്‍ത്താക്കുറിപ്പിൽ പറയുന്നു.

അതിന് പുറമെ, കോട്ടയം, ഇടുക്കി, എറണാകുളം എന്നീ ജില്ലകളില്‍ ഓറഞ്ച് അലേര്‍ട്ടും തൃശൂർ, പാലക്കാട് എന്നീ ജില്ലകളിൽ യെല്ലോ അലേര്‍ട്ടും പ്രഖ്യാപിച്ചിട്ടുണ്ട്.

തിരുവനന്തപുരം, കൊല്ലം. പത്തനംതിട്ട, ആലപ്പുഴ എന്നീ ജില്ലകളില്‍ ശക്തമായ മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥ മുന്നറിയിപ്പിൽ പറയുന്നു. ദേശീയ ദുരന്ത പ്രതികരണ സേനയുടെ എട്ട് സംഘങ്ങളെ തെക്കന്‍ കേരളത്തിലെ വിവിധ ഇടങ്ങളില്‍ വിന്യസിച്ചിട്ടുണ്ട്. വായുസേനയും നാവിക സേനയും സജ്ജമാക്കി. സംസ്ഥാനത്ത് 2849 ക്യാമ്പുകള്‍ ആരംഭിച്ചിട്ടുണ്ട്.

Also Read : 'ബുറേവി' ചുഴലിക്കാറ്റ്: സംസ്ഥാനത്ത് അതിശക്തമായ മഴയ്ക്ക് സാധ്യത, വിവിധ ജില്ലകളിൽ റെഡ്, ഓറഞ്ച്, യെല്ലോ അലേർട്ടുകൾ

നെയ്യാര്‍, കല്ലട, കക്കി ഡാമുകളുടെ സംഭരണശേഷി 80 ശതമാനമായി കുറയ്ക്കും. അതിതീവ്ര മഴയുണ്ടാകുന്ന സാഹചര്യത്തില്‍ ചെറിയ ഡാമുകളില്‍ നിന്ന് വെള്ളം പുറത്തേക്ക് ഒഴുക്കിവിടേണ്ട സാഹചര്യം ഉണ്ടായേക്കും. ഇത് മുന്‍കൂട്ടി കണ്ടുകൊണ്ടുള്ള തയ്യാറെടുപ്പുകള്‍ നടത്തിവരുന്നതായും മുഖ്യമന്ത്രി പിണറായി വിജയൻ ഇന്നലെ വാര്‍ത്താസമ്മേളനത്തിൽ പറഞ്ഞിരുന്നു.