തമിഴ്നാടിനെ സഹായിക്കണം; പിണറായിക്ക് കമലിന്‍റെ കത്ത്

തമിഴ്നാടിനായി സഹായം ആവശ്യപ്പെട്ട് കേരള മുഖ്യമന്ത്രി പിണറായി വിജയന് നടന്‍ കമല്‍ഹാസന്‍റെ കത്ത്. ഗജ ചുഴലിക്കാറ്റിന് ശേ,ം തമിഴ്‌നാട്ടിലെ ജനജീവിതം കീഴ്മേൽ മറിഞ്ഞ സാഹചര്യത്തിലാണ് നടനും മക്കള്‍ നീതി മയ്യം പ്രസിഡന്‍റും കൂടിയായ കമല്‍ ഈ ആവശ്യം ഉന്നയിച്ച്‌ കത്തയച്ചിരിക്കുന്നത്.

തമിഴ്നാട്ടിലെ നിരവധി കൃഷിയിടങ്ങള്‍, മത്സ്യബന്ധനബോട്ടുകള്‍, വീടുകള്‍, കടകള്‍, വാഹനങ്ങള്‍ അങ്ങനെ തുടങ്ങി പലതും ഗജ ചുഴലിക്കാറ്റിൽ താറുമാറായിട്ടുണ്ട്. 63 ജീവനുകള്‍ നഷ്ടപ്പെട്ടതായാണ് കണക്ക്. ഈ ഘട്ടത്തില്‍ രാഷ്ട്രീയം മറന്ന് തമിഴ്‌നാടിന് ആവശ്യമായ സഹായങ്ങള്‍ നല്‍കി സ്വന്തം കാലില്‍ നില്‍ക്കാന്‍ തമിഴ് ജനതയെ പ്രാപ്തരാക്കാൻ സഹായിക്കണമെന്ന് കേരള സര്‍ക്കാരിനോടും, മലയാളികളോടും കമല്‍ഹാസന്‍ ആവശ്യപ്പെട്ടിരിക്കുകയാണ്.

പലരുടേയും ജീവിതമാര്‍ഗ്ഗം നശിച്ചിരിക്കുകയാണ്. മലയാളികള്‍ മനുഷ്യത്വമുള്ളവരാണെന്നും മറ്റുള്ളവരെ വേദനതിരിച്ചറിയാനാകുമെന്നുമുള്‍പ്പെടെ പിണറായി വിജയന് എഴുതിയ കത്തില്‍ കമല്‍ വിശദീകരിച്ചിട്ടുണ്ട്. കേരളത്തിൽ പ്രളയം ആഞ്ഞടിച്ച സമയത്ത് 25 ലക്ഷം രൂപ കമൽഹാസൻ സംഭാവന ചെയ്തിരുന്നു. മാത്രമല്ല ഒട്ടനവധി തമിഴ്‍താരങ്ങള്‍ കേരളത്തെ സഹായിച്ചിരുന്നു. എന്നാൽ ഗജയ്ക്ക് ശേഷം ഇതുവരെ കേരളത്തിൽ നിന്നും ആരും തമിഴ്‍നാടിന് സഹായവുമായി എത്തിയിട്ടില്ലെന്നതാണ് വസ്തുത.