ചുഴലിക്കാറ്റിൽ വിറച്ച്‌ കോഴിക്കോടൻ മലയോര മേഖല; വൻ നാശനഷ്ടം

കോഴിക്കോട്: കോഴിക്കോട് ജില്ലയിലെ കിഴക്കന്‍ മലയോര മേഖലകളില്‍ വ്യാപക നാശംവിതച്ച് വന്‍ ചുഴലിക്കാറ്റ്. മരുതാംകര, കാവിലംപാറ എന്നിവിടങ്ങളിൽ ഇന്ന് പുലര്‍ച്ചെ കനത്തമഴയ്ക്കൊപ്പം വീശിയടിച്ച ചുഴലിക്കാറ്റിൽ വ്യാപക നാശനഷ്ടങ്ങളുണ്ടായി. താമരശേരി, തിരുവമ്പാടി, കോടഞ്ചേരി എന്നിവിടങ്ങളിലും ശക്തമായ കാറ്റുവീശി. കോടഞ്ചേരി, ശാന്തിനഗര്‍, പച്ചക്കാട്, നീലേശ്വരം എന്നിവടങ്ങളില്‍ വന്‍ കൃഷിനാശം സംഭവിച്ചു.

പുതുപ്പാടിയില്‍ വാഹനത്തിന് മുകളിലേക്ക് മരം കടപുഴകി വീണു. എന്നാൽ ആര്‍ക്കും പരിക്കുണ്ടായിട്ടില്ല. ഈ മേഖലകളില്‍ ഇന്നലെ വൈകിട്ട് മുതൽ തുടര്‍ച്ചയായ മഴ അനുഭവപ്പെടുന്നുണ്ട്. ഒട്ടേറെ സ്ഥലങ്ങളിൽ നിരവധി മരങ്ങള്‍ കടപുഴകി വീണ് വൈദ്യുതി ബന്ധം താറുമാറായിട്ടുണ്ട്. പശുക്കടവ് മേഖലയില്‍ രണ്ട് വീടുകള്‍ തകര്‍ന്നിട്ടുണ്ട്. വടകരയില്‍ കടല്‍ക്ഷോഭം രൂക്ഷമാണെന്ന റിപ്പോര്‍ട്ടാണ് ലഭിക്കുന്നത്. ഗതാഗതം തടസപ്പെട്ട പ്രദേശങ്ങളില്‍ പോലീസും ഫയര്‍ഫോഴ്‌സും ചേര്‍ന്ന് പ്രവര്‍ത്തിച്ച് ഗതാഗതം പുനഃസ്ഥാപിച്ചു.