ഉഴുന്നുവടയെചൊല്ലി തർക്കം: ഹോട്ടലുടമയെ കുത്തിക്കൊന്നു

കൊച്ചി: ഭക്ഷണം കഴിച്ചതിനെ ചൊല്ലിയുണ്ടായ തര്‍ക്കത്തെ തുടര്‍ന്ന് പട്ടാപ്പകല്‍ ഹോട്ടലുടമയെ നടുറോഡില്‍ വെട്ടിക്കൊലപ്പെടുത്തി. വൈറ്റിലയില്‍ ഷെബിന്‍ ഹോട്ടല്‍ നടത്തുന്ന ജനത റോഡില്‍ മങ്കലപ്പിള്ളില്‍ ജോണ്‍സണാണ് (45) കൊല്ലപ്പെട്ടത്. ബുധനാഴ്ച്ച ഉച്ചയ്ക്ക് 2.30 ന് വൈറ്റില ജനത ജംഗ്ഷന് സമീപമാണ് സംഭവം. പ്രതിയായ ഇടുക്കി സ്വദേശി പ്രതീഷ് ഒളിവിലാണ്.

ഹോട്ടലിലെത്തിയ പ്രതീഷ് ഉഴുന്നു വട കഴിച്ചു. പുളിയാണെന്ന് പറഞ്ഞ് വഴക്കുണ്ടാക്കിയതോടെ ജോണ്‍സണ്‍ പൈസ വാങ്ങിയില്ല. പിന്നീട് പഴം വാങ്ങാന്‍ മറ്റൊരു കടയിലേക്ക് പോയ ജോണ്‍സണെ പതുങ്ങിയിരുന്ന പ്രതിഷ് മാരകായുധവുമായി കഴുത്തിന് വെട്ടിയെന്നാണ് പൊലീസ് പറയുന്നത്. കഴുത്തിന് ആഴത്തില്‍ മുറിവേറ്റ ജോണ്‍സണ്‍ റോഡില്‍ വീണു. ഉടന്‍ തൊട്ടടുത്തുള്ള വെല്‍കെയര്‍ ആശുപത്രിയില്‍ എത്തിച്ചെങ്കിലും സ്ഥിതി ഗുരുതമായോടെ എറണാകുളം മെഡിക്കല്‍ ട്രസ്റ്റിലേക്ക് മാറ്റുകയായിരുന്നു. എന്നാല്‍, 3.25 ന് മരിച്ചു.

പ്രതീഷിനെ ഇതുവരെ കണ്ടെത്താനായില്ലെന്ന് പൊലീസ് പറയുന്നു. എന്ത് തരത്തിലുള്ള ആയുധം കൊണ്ടാണ് വെട്ടിയതെന്നും വ്യക്തമല്ല. ഇവര്‍ തമ്മില്‍ മറ്റ് എന്തെങ്കിലും ഇടപാടുകളോ തര്‍ക്കങ്ങളോ ഉണ്ടായിട്ടുണ്ടോയെന്നും പൊലീസ് പരിശോധിക്കുന്നുണ്ട്.


hotelier murder vyttila
Customer stabs restaurant owner to death in Kochi