സുരേന്ദ്രന്‍റെ ഹർജിയിലെ 'മരിച്ച' അഹമ്മദ് കുഞ്ഞി കോടതിയിൽ

മഞ്ചേശ്വരം: തെരഞ്ഞെടുപ്പ് റദ്ദാക്കണമെന്ന് ആവശ്യപ്പെട്ട് കെ.സുരേന്ദ്രൻ നൽകിയ ഹർജി വിവാദത്തിലേക്ക്. മഞ്ചേശ്വരം മണ്ഡലത്തിലെ തെരഞ്ഞെടുപ്പിൽ മരിച്ചവർ പോലും വോട്ട് ചെയ്‌തെന്ന് വരുത്തിയാണ് അബ്ദുൾ റസാഖ് എംഎൽഎയായി വിജയിച്ചതെന്ന് സുരേന്ദ്രൻ ആരോപിച്ചിരുന്നു. അതിനാൽ തെരഞ്ഞെടുപ്പ് റദ്ദാക്കണമെന്ന് ആവശ്യപ്പെട്ടാണ് സുരേന്ദ്രൻ ഹൈക്കോടതിയിൽ ഹർജി സമർപ്പിച്ചത്.

എന്നാൽ സുരേന്ദ്രൻ നൽകിയ ഹർജിയിൽ മരിച്ചു പോയി എന്ന് കാണിച്ചിട്ടുള്ള അഹമ്മദ് കുഞ്ഞി ഹൈക്കോടതിയിൽ ഹാജരായി. താൻ തന്നെയാണ് വോട്ട് ചെയ്‌തെന്ന് അഹമ്മദ് കുഞ്ഞി കോടതിയിൽ അറിയിച്ചു. മുപ്പത്തിയേഴാം ബൂത്തിലെ എണ്ണൂറാമത്തെ വോട്ടറാണ് അമ്മദ് കുഞ്ഞി. അഹമ്മദ് കുഞ്ഞിയുടെ പേരിൽ മറ്റാരോ വോട്ട് ചെയ്‌തെന്നായിരുന്നു സുരേന്ദ്രൻ ഹർജിയിൽ പറഞ്ഞത്.

വിദേശത്തുളളവരുടെയും സ്ഥലത്തില്ലാത്തവരുടെയും പേരില്‍ വോട്ട് ചെയ്യപ്പെട്ടിട്ടുണ്ടെന്നും ഹർജിയിൽ സുരേന്ദ്രൻ പറഞ്ഞിരുന്നു. ഹർജി പ്രകാരം പട്ടികയനുസരിച്ച് 259 പേരെയാണ് കോടതി വിളിച്ചുവരുത്തി തെളിവെടുക്കാന്‍ നോട്ടീസ് അയച്ചിട്ടുളളത്. വിദേശത്തായിട്ടും വോട്ട് ചെയ്‌തെന്ന് ചൂണ്ടിക്കാട്ടി നല്‍കിയ പട്ടികയിലെ ചിലര്‍ സമന്‍സ് ലഭിച്ചതിനെ തുടര്‍ന്ന് കഴിഞ്ഞ ദിവസം കോടതിയില്‍ എത്തിയിരുന്നു. ഇവരെയും കോടതി വിസ്തരിച്ചു.

'dead' in surendran's plea appeared in court

K.Surendran's plea in High Court to call off the poll in Manjeswaram has stirred up new controversies