ഇന്ന് മരണപ്പെട്ട റോജയുടെ മരണകാരണം നിപയല്ല

കോഴിക്കോട്: നിപ രോഗലക്ഷണങ്ങളോടെ മരിച്ച തലശ്ശേരി സ്വദേശി റോജ (39)യുടെ മരണകാരണം നിപയല്ലെന്ന് സ്ഥിരീകരണം. ഇവരുടെ ഇന്നത്തെ രക്തസാമ്പിള്‍ പരിശോധനാഫലം നെഗറ്റീവാണ്. കോഴിക്കോട് മെഡിക്കൽ കോളേജിൽ ചികിത്സയിലായിരുന്ന ഇവരുടെ രക്തം രണ്ടു ദിവസം മുൻപ് പരിശോധിച്ചപ്പോള്‍ ഫലം നെഗറ്റീവായിരുന്നെങ്കിലും ഇന്ന് രാവിലെയോടെ രോഗം മൂര്‍ച്ഛിച്ച് മരണപ്പെടുകയായിരുന്നു.

നിലവിൽ നിപ വൈറസ് ബാധിതരുമായ സമ്പര്‍ക്കത്തിലുണ്ടായിരുന്ന 17 പേര്‍ സൂക്ഷ്മനിരീക്ഷണത്തിലും 1945 പേര്‍ സമ്പര്‍ക്കപ്പട്ടികയിലുമുണ്ട്. ഇതിനിടെ വൈറസ് ബാധ സംശയിച്ച് വെള്ളിയാഴ്ച ആറുപേരെക്കൂടി കോഴിക്കോട് മെഡിക്കൽ കോളേജിൽ പ്രവേശിപ്പിച്ചിട്ടുണ്ട്.

വൈറസ് ബാധിതരുമായി ഇടപഴകിയവര്‍ക്ക് വൈറസ് പകരാൻ സാധ്യതയുള്ളതിനാൽ ഇത്തരക്കാര്‍ ജാഗ്രത പാലിക്കണമെന്ന് ആരോഗ്യമന്ത്രി കെ കെ ശൈലജ പറഞ്ഞു. ആരോഗ്യവകുപ്പ് ഡയറക്ടറുടെ നേതൃത്വത്തിലുള്ള കോഴിക്കോട്ടെ കൺട്രോള്‍ റൂം വൈറസ് ബാധ പൂര്‍ണമായും നിയന്ത്രണവിധേയമാകുംവരെ പ്രവര്‍ത്തിക്കുമെന്നും മന്ത്രി കൂട്ടിച്ചേര്‍ത്തു. ഈ മാസം നാലിന് വിഷയം ചര്‍ച്ച ചെയ്യാൻ സര്‍വകക്ഷിയോഗം വിളിച്ചുചേര്‍ക്കുമെന്നും മന്ത്രി വ്യക്തമാക്കി.