ആപ്പ്ജില്ല

സജി ചെറിയാന്‍ രാജി വെക്കുമോ? തീരുമാനം നാളത്തെ സിപിഎം സെക്രട്ടേറിയറ്റില്‍

എതിരാളികള്‍ക്ക് ആയുധം നല്‍കുന്ന നടപടിയാണ് ഉണ്ടായിട്ടുള്ളതെന്നും വാക്കുകളില്‍ മിതത്വം പാലിക്കേണ്ടിയിരുന്നെന്നും നേതാക്കള്‍ അവയ്‌ലബിള്‍ സെക്രട്ടേറിയറ്റ് യോഗത്തില്‍ കുറ്റപ്പെടുത്തി.

Samayam Malayalam 6 Jul 2022, 3:01 pm
തിരുവനന്തപുരം: ഭരണഘടനയ്‌ക്കെതിരെ വിവാദ പരാമര്‍ശം നടത്തി വിവാദക്കോളങ്ങളില്‍ ഇടംപിടിച്ച മന്ത്രി സജി ചെറിയാന്റെ രാജി ആവശ്യത്തില്‍ സിപിഎം സംസ്ഥാന സെക്രട്ടേറിയറ്റ് വ്യാഴാഴ്ച തീരുമാനമെടുക്കും. ഇന്ന് അവയ്‌ലബിള്‍ സെക്രട്ടേറിയറ്റില്‍ വിഷയം ചര്‍ച്ച ആയിരുന്നു. എന്നാല്‍, അന്തിമ തീരുമാനം വ്യാഴാഴ്ച സമ്പൂര്‍ണ സെക്രട്ടേറിയറ്റ് യോഗത്തില്‍ മതിയെന്നാണ് തീരുമാനം.
Samayam Malayalam Saji Cheriyan FB


Also Read:
സ്വപ്ന ഇനി ശമ്പളമില്ലാത്ത അധ്യക്ഷ; പിരിച്ചുവിട്ട് എച്ച്ആര്‍ഡിഎസ്, ശിവശങ്കറിന്‍റെ കാര്യത്തില്‍ മാന്യത കാട്ടുമോ?

ഇന്ന് ചേര്‍ന്ന യോഗത്തില്‍ വിവാദ പരാമര്‍ശത്തിന്റെ പശ്ചാത്തലത്തില്‍ മന്ത്രിക്കെതിരെ വിമര്‍ശനം ഉയര്‍ന്നു. യോഗത്തില്‍ എതിരാളികള്‍ക്ക് ആയുധം നല്‍കുന്ന നടപടിയാണ് ഉണ്ടായിട്ടുള്ളതെന്നും വാക്കുകളില്‍ മിതത്വം പാലിക്കേണ്ടിയിരുന്നെന്നും നേതാക്കള്‍ കുറ്റപ്പെടുത്തി.

സിപിഎം അവയ്‌ലബിള്‍ സെക്രട്ടേറിയറ്റിലേക്ക് മുഖ്യമന്ത്രി പിണറായി വിജയന്‍ ഉള്‍പ്പെടെ പ്രമുഖ നേതാക്കളെല്ലാം എത്തിയിരുന്നു. രാജിവെക്കുമോയെന്ന മാധ്യമ പ്രവര്‍ത്തകരുടെ ചോദ്യത്തിന് എന്തിന് രാജിവെക്കണമെന്നും എന്താണ് പ്രശ്‌നമെന്നും സെക്രട്ടേറിയറ്റ് യോഗത്തിന് ശേഷം സജി ചെറിയാന്‍ ചോദിച്ചു. എന്താണ് പ്രശ്‌നമെന്നും ഇക്കാര്യത്തില്‍ ഇന്നലെ പറഞ്ഞതില്‍ കൂടുതലൊന്നും പറയാനില്ലെന്നും അദ്ദേഹം പറഞ്ഞു.

വിവാദ പ്രസംഗത്തിന്റെ പേരില്‍ മന്ത്രി സജി ചെറിയാന്‍ തത്ക്കാലം രാജിവെക്കേണ്ടതില്ലെന്ന നിലപാടിലാണ് സിപിഎം. മന്ത്രി നിയമസഭയില്‍ ഖേദപ്രകടനം നടത്തുകയും പ്രസ്താവന വാര്‍ത്താക്കുറിപ്പായി പുറത്തിറങ്ങുകയും ചെയ്ത പശ്ചാത്തലത്തില്‍ വിവാദങ്ങള്‍ അവസാനിപ്പിക്കാനുള്ള ശ്രമത്തിലാണ് സര്‍ക്കാരും സിപിഎം നേതൃത്വവും.

പത്തനംതിട്ട മല്ലപ്പള്ളിയില്‍ നടന്ന പരിപാടിക്കിടെയാണ് മന്ത്രി സജി ചെറിയാന്‍ വിവാദ പ്രസ്താവന നടത്തിയത്. രാജ്യത്തെ ജനങ്ങളെ കൊള്ളയടിക്കാന്‍ പറ്റിയ ഭരണഘടനയാണ് എഴുതി വച്ചിരിക്കുന്നതെന്നായിരുന്നു മന്ത്രിയുടെ ഗുരുതര ആരോപണം. പ്രസ്താവന വിവാദമായതോടെ വിശദീകരണവുമായി മന്ത്രി രംഗത്തുവന്നിരുന്നു.

Also Read: ഹിമാചല്‍ പ്രദേശില്‍ മേഘ വിസ്‌ഫോടനം; ഒരു മരണം, ആറ് പേരെ കാണാതായി

'താന്‍ ഭരണഘടനയെ വിമര്‍ശിച്ചു എന്ന രീതിയില്‍ വരുന്ന വാര്‍ത്തകള്‍ വളച്ചൊടിക്കപ്പെട്ടു. ഭരണഘടനയെ ബഹുമാനിക്കുകയും അതിന്റെ ഉദാത്തമായ മൂല്യങ്ങള്‍ ഉയര്‍ത്തിപ്പിടിക്കുകയും ചെയ്യുന്ന പൊതുപ്രവര്‍ത്തകനാണ് താന്‍. താനുള്‍പ്പെടുന്ന പ്രസ്ഥാനം ഭരണഘടനയെയും അതില്‍ ഉയര്‍ത്തിപ്പിടിച്ചിട്ടുള്ള മൂല്യങ്ങളെയും സംരക്ഷിക്കണമെന്ന ആവശ്യം രാജ്യത്തെമ്പാടും ഉയര്‍ത്തിപ്പിടിക്കുന്നവരുടെ മുന്‍പന്തിയിലാണ്'- എന്ന് മന്ത്രി കഴിഞ്ഞ ദിവസം നിയമസഭയില്‍ പറഞ്ഞു.

ആര്‍ട്ടിക്കിള്‍ ഷോ

ട്രെൻഡിങ്