കഠ്‍‍വ സംഭവം: ഫേസ്ബുക്കിൽ കുറിച്ച ദീപാ നിശാന്തിനെതിരെ സൈബര്‍ ആക്രമണം

കൊച്ചി: കഠ്‍‍വ സംഭവത്തില്‍ ഫേസ്ബുക്കിലൂടെ പ്രതികരണം വ്യക്തമാക്കിയ എഴുത്തുകാരി ദീപാ നിശാന്തിനെതിരെ സൈബര്‍ ആക്രമണം ശക്തം. മോര്‍ഫ് ചെയ്ത ചിത്രങ്ങളും ഫോണ്‍ നമ്പറും വിവിധ ഗ്രൂപ്പുകളില്‍ പ്രചരിപ്പിക്കുന്നതിനെതിരെ പോലീസില്‍ പരാതി നല്‍കുമെന്ന് ദീപ നിശാന്ത് വ്യക്തമാക്കി.

സൈബര്‍ ആക്രമണത്തിനെതിരെ മുൻപ് നല്‍കിയ പരാതിയില്‍ ഒരു നടപടിയും ഉണ്ടായില്ലെന്നും ദീപ നിശാന്ത് ആരോപിച്ചു. കഠ്‍‍വ സംഭവത്തിന് പിന്നാലെ, സിപിഎം അനുഭാവിയായ ദീപക് ശങ്കര നാരായണന്‍ ഫേസ് ബുക്കില്‍ പോസ്റ്റ് ചെയ്ത കുറിപ്പ് ദീപാ നിശാന്ത് റീ പോസ്റ്റ് ചെയ്തിരുന്നു. ഇതിന് പിന്നാലെയാണ് സൈബര്‍ ആക്രമണത്തിന് തുടക്കമായത്. ഫോണിൽ നിരന്തരം ഭീഷണി ആരംഭിച്ചതിനെ തുടര്‍ന്ന് പല ഗ്രൂപ്പുകളിലും ഫോണ്‍ നമ്പറും മോശം ചിത്രങ്ങളും പ്രചരിപ്പിക്കാൻ ആരംഭിച്ചു.

എം.എഫ്.ഹുസൈന്‍റെ ചിത്രത്തെ അനുകൂലിച്ചതിനായിരുന്നു മുൻപ് സൈബര്‍ ആക്രമണം നടന്നത്. പരാതി നല്‍കുമ്പോൾ ഫേസ് ബുക്ക്, വാട്ട്‍‍സാപ്പ് സ്ക്രീന്‍ ഷോട്ടടക്കം സമര്‍പ്പിക്കാറുണ്ട്. എന്നാൽ അതിൽ ഒരു നടപടിയും ഉണ്ടാകാത്തതാണ് സംഭവങ്ങള്‍ ആവര്‍ത്തിക്കാന്‍ കാരണമെന്നും ദീപ നിശാന്ത് ചൂണ്ടിക്കാട്ടി.