നോട്ട് നിരോധന വാര്‍ഷികം; ആര്‍ബിഐക്ക് മുന്നില്‍ പ്രതിഷേധം

കൊച്ചി: നോട്ട് നിരോധനത്തിന്റെ ഒന്നാം വാര്‍ഷികത്തില്‍ കൊച്ചിയിലെ റിസര്‍വ് ബാങ്ക് ഓഫീസിന് മുന്നില്‍ പ്രതിപക്ഷ പാര്‍ട്ടികളുടെ പ്രതിഷേധ മേള. എല്‍ഡിഎഫ്, കോണ്‍ഗ്രസ്, ശിവസേന, എസ്ഡിപിഐ തുടങ്ങിയവയാണ് പ്രതിഷേധവുമായെത്തിയത്. എല്‍ഡി എഫിന്‍റെ നേതൃത്വത്തിലാണ് റിസര്‍വ് ബാങ്ക് ഓഫീസിന് മുന്നിലെ പ്രതിഷേധ പ്രകടനങ്ങള്‍ക്ക് തുടക്കം കുറിച്ചത്.

കലൂരില്‍ നിന്ന് എല്‍ഡിഎഫ് പ്രതിഷേധ പ്രകടനം ആരംഭിച്ചു. റിസര്‍വ് ബാങ്ക് ഓഫീസിന് മുന്നില്‍ സിപിഎം സംസ്ഥാന സെക്രട്ടറിയേറ്റ് അംഗം എം വി ഗോവിന്ദന്‍ മാസ്റ്റര്‍ പ്രകടനം ഉദ്ഘാടനം ചെയ്തു. നോട്ട് നിരോധനം ഇന്ത്യന്‍ സമ്പദ് വ്യവസ്ഥയുടെ നട്ടൊല്ലൊടിക്കുന്ന നടപടിയായിരുന്നെന്ന് പറഞ്ഞ ഗോവിന്ദന്‍ മാസ്റ്റര്‍ ജിഎസ്ടി ഇന്ത്യയുടെ ചെറുകിട വ്യവസായങ്ങളെ തകര്‍ത്തെന്നും വ്യക്തമാക്കി.

ജിഎസ്ടി നടപ്പാക്കാന്‍ ബിജെപിക്ക് ഒത്താശ ചെയ്ത കോണ്‍ഗ്രസ് നടത്തുന്ന പ്രതിഷേധം അപഹാസ്യമാണെന്നും അദ്ദേഹം പറഞ്ഞു. എല്‍ഡിഎഫ് യോഗത്തിനിടെ തന്നെ ടൗണ്‍ ഹാളില്‍ നിന്നും കെപിസിസി പ്രസിഡന്റ് എം എം ഹസന്റെ നേതൃത്വത്തില്‍ കോണ്‍ഗ്രസ് പ്രതിഷേധ പ്രകടം എത്തി. പ്രതിഷേധ യോഗത്തിനു ശേഷം കോണ്‍ഗ്രസ് പ്രവര്‍ത്തകര്‍ മോദിയുടെ കോലം കത്തിച്ചു